Khasaare kala duwan oo isugu jira dhimasho iyo dhaawac ayaa ka dhashay shil baabuur oo ka dhacay deegaan dhaca ismaamulka Amhara ee waqooyiga dalka Itoobiya.
Shilka ayaa yimid kaddib markii uu rogmaday baabuur marayay agga Sekota oo dhaca gobolka Axmaarada, halkaas na ay ku dhinteen ugu yaraan 5 qof oo Itoobiyaan ah, halka ay ku dhaawacmeen 11 kale.
War kasoo baxay xafiiska isgaarsiinta Waghimra, ayaa lagu sheegay in shilka uu si gaar ah u galay gaari nooca dadweynaha ah, kaasi oo rogmaday xilli uu marayay deegaan lagu magacaabo Afera Got, waxaana gaarigan uu xilligaasi siday meyd laga soo qaaday magaalada Dessie loona waday Sekota.
Dadka ku dhintay dhacdadan ayaa lagu kala sheegay in saddex ka mid ah ay rag ahaayeen, halka labada kalena ay ahaayeen haween saarnaa baabuurka shilka galay.
Waxay sidoo kale warbixinnadu xaqiijinayaan in dadka shilka ku dhaawacmay ay ka koobanyihiin 7 qof oo rag ah iyo 4 xubnood oo haween ah, kuwaas oo dhaawacyadoodu u dhexeeyaan kuwo fudud iyo kuwo daran.
Sisay Aberaw oo ah kormeeraha nabadgelyada waddooyinka ee saldhigga Booliiska Sekota, ayaa dhankiisa carrabaabay inaan si sax ah loo ogayn sababta keentay shilka, balse ay baaritaan ku wadaan dhacdadaasi.
Shilkan laga soo tabiyay ismaamulka Amhara ee dhaca waqooyiga Itoobiya ayaa qayb ka ah shilalka gaadiidka ee laga soo wariyo gobollada kala duwan ee dalkaasi, kuwaas oo sannad walba gallaafta nolashada dadyow badan oo Itoobiyaan ah.
About The Author
