Inta la xaqiijiyay inka badan 20 qof oo shacab ah ayaa ku dhintay tiro kalena waa ay ku dhaawacmeen, kaddib markii madaafiic lagu garaacay suuq kuyaal magaalada Khartuum ee caasimadda u ah waddanka Suudaan.
Ilo wareedyo deegaanka ah ayaa kusoo waramaya in madaafiicda oo qayb ka ahaa hubka ay is dhaafsanayeen dhinacyada millatariga Suudaan iyo kuwa RSF ee kasoo horjeeda ay ku dhaceen suuqa Ummu-durmaan, halkaas oo ay maanta dagaallo culus ku dhexmareen Ciidanka Burhaan iyo kuwa mucaaradka.
“In ka badan labaatan qof oo rayid ah ayaa ku dhintay, kuwo kalena waa ay ku dhaawacmeen,” waxaa sidaas lagu yiri warsaxaafadeed kooban oo loo diray AFP.
Sabtidii lasoo dhaafay ayay ahayd markii madaafiic xooggan oo lagu garaacay guryo rayid oo kuyaal magaalada caasimadda ah ee Khartuum ay ku dhinteen 15 qof oo rayid ah, sida ay xaqiijiyeen ilo wareedyo caafimaad.
Umdurman waxay marar badan marti gelisay dagaallo qaraar oo dhexmaray labada dhinac ee isku haya hoggaaminta xukuumadda Suudaan, dagaallada ayaa xooggiisa ka dhici jiray caasimadda iyo galbeedka gobolka Darfur, balse waxa uu muddooyinkii dambe ku fiday koonfurta caasimadda Khartuum, waxaana sii kordhay duqaymaha ka dhanka ah dadka rayidka ah ee ka dhacaya suuqyada iyo guryaha rayidka ah.
About The Author
