Dibadbaxyo xooggan oo ka dhan ah hindise ah ay soo saartay dowladda Kenya, ayaa ka socda inta badan ismaamullada dalka Kenya, halkaas oo ay isku dhacyo ku dhexmarayaan ciidamada booliska iyo kumanaan dhalinyaro ah oo gadoodsan.
Isku soo baxyada oo soo billowday Talaadadii lasoo dhaafay ayaa imika ka soconaya inta badan ismaamulada, khamiistii waxay isku soo baxyada ugu xooggan ka dhaceen magaalada Nairobi ee caasimadda u ah dalka Kenya.
Inta la xaqiijiyay ugu yaraan hal qof ayaa dhintay halka 200 oo qofna ay ku dhaawacmeen isku soo baxyada ka dhacay ismaamullada Kenya, sida lagu sheegay warbixin kasoo baxay hayadaha u dooda xaquuqda aadanaha.
Dadka dhintay iyo kuwa dhaawacmay oo u badan dhalinyaro Kenyaan ah, ayaa ka gadoodsan qorsheyaal kasoo baxay Kenya oo lagu aruurinaayo 2.7 bilyan oo doollarka Maraykanka ah.
Booliska ayaa sunta dadka ka ilmeysiisa ku kala eryay dad badan oo isku soo baxyo ka dhan ah dowladda ka dhigay magaalada caasimadda ah ee Nairobi, Amnesty International iyo Ururka Dhakhaatiirta ee Kenya, ayaa bayaan wadajir ah oo ay soo saareen gelinkii dambe ee Khamiistii lasoo dhaafay ku cambaareeyay dilalka iyo dhaawaca ay gaysteen ciidamada booliska ee dowladda Wilam Ruto.
Dibadbaxayaasha kasoo horjeeda dowladda ee kacdoonka ka wada ismaamulka Kisii waxay dhankooda xildhibaannada uga digeen ansixinta hindise sharciyeedka maaliyadda ee lacagaha balaayiinta doollar ee dheeraadka ah loogu aruurinayo dowladda Kenya.
About The Author
