Dhacdooyin argagax leh ayaa laga soo sheegayaa magaalada Nairobi ee caasimadda u ah dalka Kenya, halkaas oo si arxan-darro ah loogu dilay ugu yaraan 4 qof oo Soomaali ah.
Wararka ka imaanaya magaalada Nairobi waxay sheegeen in si naxariis darro ah loo dilay hooyo, gabadheeda iyo gabar kale oo ay waalid u tahay iyo wiil kale oo Soomaali ah.
Hooyada iyo gabdhaheeda ayaa maydadkooda oo qaarkood la dooriyay laga helay xaafadaha Bagland iyo majaakoos, sida ay soo sheegeen dad goobjoogeyaal ah, dhacdada saddexdan qof lagu dilay kaddib waxaa xigay dhacdo kale oo dil naxariis darro ah, waxaana maydka wiil dhalinyaro ah laga helay xaafadda Islii ee Soomaalidu ku badan tahay.
Goobjoogeyaal ayaa soo sheegay in hooyada sida arxan darrada ah loo dilay lagu magacaabi jiray Weris daa’uud oo 36 sana jir ah, gabadheeda oo la oran jiray Aamina Cabdirashiid oo 21 jir ah iyo Nuseyba oo ay eeddo u ahayd oo 12 sana jir, hooyada iyo gabdhaheeda ayay wararku sheegayaan in gowrac lagu dilay, maydadkoodana ay ka muuqdeen raadadka jirdilka.
Saacado kaddib markii la helay maydadka dadkan saddexda ah ee lagu dilay Nairobi, waxaa dhanka kale maydkiisa la helay wiil soomaali dhalinyara ah, kaasi oo lasoo dhigay xaafadda Islii, taasi oo wadarta guud dadka Soomaaliyeed ee la dilay ka dhigaysa 4 qof oo seddax dumar tahay.
Dadka Soomaaliyeed ee ku dhaqan magaalada Nairobi ayaa ka argagax aydhacdooyinkan xanuunka badan ee lagu dilay dadka rayidka ah ee haweenka u badan.
Xaaladan cusub ee lasoo gudboonaatay dadka Soomaaliyeed ee ku dhaqan magaalada Nairobi ayaa kusoo beegmaysa, xilli muddooyinkii dambe laga cabanayay gaadiidka tagaasida ee ka howlgala Nairobi, kuwaas oo badanaa ay raacaan qoysaska iyo shakhsiyaadka Soomaaliyeed ee ku dhaqan caasimadda Kenya.
About The Author
