Xiisadda colaadeed ee muddada badan kasoo aloosan gudaha dalka Itoobiya ayaa lagu soo warramayaa inay cirka isku sii shareertay, waxaana si gaar ah gobolka Amxaarada uga socda dagaallo ba’an iyo weliba abaabul ciidan oo hor leh oo aad u xooggan.
Xubin ka tirsan guddida fulinta ee Jabhadda Fano, ayaa warbaahinta la wadaagay jiritaanka kolonyo ciidamo ah oo la sheegay inay ka tirsan yihiin kuwa maamulka Abiy Axmed oo gudaha u galay magaalada Bahar Daar ee gobolka Gonder, xilli ay u jihaysnaayeen waqooyiga Gojjam.
Ujeedka ciidamadan oo mas’uulkani ku micneeyey inay tahay sidii loo wiiqi lahaa awoodda maleeshiyaadka Fano, ayaa geesta kalena ay wararku tibaaxayaan in jimcihii shalay jabhaddu ay weerar culus ku beegsatay ciidanka dowladda Xabashida Itoobiya ee ku sugan deggaanka Gojjam.
Warbaahinta Ethio News oo soo xiganaysa ilo-wareedyo ka tirsan gobolka ayaa ku waramaaya in ciidanka dawladdu ay ku guda jiraan hawl-gal ay ku doonayaan inay dib ula wareegaan gacan-ku-haynta deegaannadii laga fara-maroojiyey ee haatan ay maamulaan jabhadaha Faano.
Mas’uulkan u hadlay Jabhadda Fano oo uu soo xigtay wargeyska Itoobiyaanka ah ee Borkena ayaa isna shaaciyey in dhamaan jabhadaha Fano ee ku sugan Goojjam ay diyaar u yihiin ka jawaabista duullaan kasta oo kaga yimaadda dhinaca dowladda.
About The Author
