R/Wasaaraha Itoobiya Abiy Axmed ayaa ku hanjabay in ay kala daadin doonaan cadawga Itoobiya xilli xiisadda gobolku ay cirka isku sii shareertay.
Gaal Abiy Axmed ayaa hadalkan kaga dhawaaqay khudbad uu shalay ka jeediyey meel fagaare ah, waxaanu carrabka ku adkeeyey in cadawgooda ay mid mid u beegsan doonaan.
Intii uu jeedinayay hadalladan goodiska ah, ayuu dhanka kalena bulshadda Itoobiya ugu baaqay inay feejignaadaan oo aanay u nuglaan faro-gelinta shisheeye. Waxaanu ka digay in ay noqdaan aalad ay shisheeyuhu adeegsadaan.
Sidoo kale Taliyaha ciidamada Itoobiya Jaraal Birhanu Jula ayaa isna maalin ka hor jeediyey hadallo goodis ah oo aad ugu dhow hanjabaadda uu diray R/Wasaaraha Itoobiya Gaal Abiy Axmed.
Waxa uu sheegay in haatan ay u diyaar-garoobeen sidii ay u burburin lahaayeen cadawga Itoobiya. Isagoo xusay in carrabka ku dhuftay in cadaw fara badan ay dhexda ugu jiraan oo dhan walba ay ka xigaan.
Hanjabaadahan ugu dambeeyey oo shalay iyo maalintii kasii horeysay kasoo kala yeeray mas’uuliyiinta ugu sarraysa dawladda Xabashida Itoobiya ayaa kusoo aadaya xilli ay xaaladdu sii murgayso, isla markaana maamullada Asmara iyo Addis Ababa ay isku biro-tumanayaan, qarkana u saaran yihiin dagaal lagu hoobto oo mar kale ka dhex-qarxa labadaasi dhinac.
Filashada dagaalkan ayaa aad u soo dhawaatay kadib markii dhawaan dawladda Xabashida Itoobiya ay si cad u sheegtay in ay isku diyaarinayso sidii ay u qabsan lahayd dekedda Casab ee Eretriya oo ay ku doodayso in iyadu ay leedahay awood millaterina ay kusoo ceshan doonto.
About The Author
