War Saxaafadeed ku qornaa luuqadda English ka oo nuqul ka mid ah loo qeybiyey warbaahinta ayey Al-Shabaab si cad uga soo horjeedsatay heshiiskii dhexmaray dowladaha Turkiga iyo Soomaaliya ee shaley uu iclaamiyey Xasan Sheekh Maxamuud.
“Dambiyadii ugu dambeeyey ee xukuumada Xasan Sheekh Maxamuud ka gashay muslimiinta Soomaaliya iyo madaxbanaanidooda waxaa kamid ah inay markale xaraashtay siyaayadadii wadanka iyo kheyraadkii Umadda kadib heshiis sharci daro ah oo ay la gashay dowlada ridada ah ee Turkiga.” ayaa lagu yiri war saxaafadeedka.
War saxaafadeedka ayaa lagu sheegay in heshiiskaas uu la mid yahay isla midkii dhexmaray Somaliland iyo Itoobiya ee xabashida lagu siiyey qeybo kamid ah xeebaha Soomaaliya.
“Isfaham kan xaaraanta ah ee dhigaya in dowladda Turkiga ay si toos ah ula wareegto maamulka dakhliga iyo soohdimaha badda Soomaaliya, waxay Xarakada Mujaahidiinta Al-Shabaab ka aaminsan tahay heshiis baadhil ah oo la mid ah -haddiiba uusan ka halis badneen- is-afgaradkii khiyaanada ahaa ee dhexmaray Muuse Biixi iyo Abiy Axmad.” ayaa lagu yiri war saxaafadeedka.
War Saxaafadeedka ayaa lagu sheegay in heshiiskan uu qeyb ka yahay damacyada ku beeran xukuumada Ankara ee ku salleysan boobka kheyraadka wadanka.
“Marka meel la iska dhigo hal-kudhegyada beenta ah iyo hadalada afka baarkii ah ee uu ku hadaaqayo Xasan Sheekh Maxamuud, heshiiskan dhexmaray dowladaha ridada ah ee Turkiga iyo Soomaaliya, ma ahan mid ku salleysan hormarin dhaqaale, iyo difaac qaranimo midna, balse taasi badalkeed, waa muuqaal kale oo soo bandhigaya hanqaltaaga Turkiga ee qabsashada mandiqadda.” ayaa lagu yiri war saxaafadeedka
War Saxaafadeedka oo sii socda ayaa lagu yiri: “Mudd ka badan 10 sano, Wuxuu Turkiga Soomaaliya ka dhigtay dhul uu uga faa’ideysto danihiisa siyaasadeed iyo kuwa dhaqaale ee uu ka leeyahay gobolka, isagoo dhulka la galay dhaqaalihii wadanka, kala dhantaalay dhaqaalihii wadanka, sidoo kalena qalqal geliyey amnigii iyo badqabkii bulshada Soomaaliyeed. Diyaaradaheeda drones ka ayey ku gumaaday maatida Soomaaliyeed ee muslimka ah, halka faragelinteeda dhaqaalena uu sicir barar ka abuuray dalka, fahmajab iyo rajo beelna ku beeray xoogsatada iyo ganacsatada Soomaaliyeed.”
Al-Shabaab ayaa sheegtay in Xasan Sheekh Maxamuud uu ogol yahay in la boobo kheyraadka dalka marba haddii isaga uu yahay ninka loo soo marayo dhabaha lagu bililiqeysanayo hantida Umadda. “Heshiiskan wuxuu sidoo kale banaanka soo dhigay laba codleynta iyo munaafaqnimada Xasan Sheekh Maxamuud, iyo in uusan wax dan iyo muraad ah ka lahayn boobka iyo bililiqada lagu hayo dalka iyo kheyraadkiisa, marba haddii uu isagu yahay dullaalka la soo marayo.” ayaa lagu yiri war saxaafadeedka.
Markale waxaa bayaanka lagu yiri: “Heshiiskan wuxuu sidoo kale soo bandhigayaa taya-xumada, taagdaradii iyo sarriig la’aanta waxa loogu yeero dowladda Soomaaliya, taas oo si cad u qiratay in aysan dalka ka difaaci karin cadaawaha shisheeye, wadiiqada kaliya ee lagu difaaci karo dalka iyo kheyraadkiisuna ay tahay inay magangalaan dowlado kale taas oo macnaheedu yahay in loo noqdo wixii la oran jiray Maxmiyada.” ayaa lagu yiri war saxaafadeedka.
Ugu dambeyntii waxaa bayaanka lagu yiri: “Xarakada Mujaahidiinta Al-Shabaab waxay markale cadeyneysaa in ay diiday heshiiska baadhilka ah ee ay kala saxiixdeen dowladaha ridada ah ee Turkiga iyo Soomaaliya, ayna markale ku celineyso in cidna aysan xaq u lahayn in xaraashto dhulka Umadda Soomaaliyeed iyo hantida uu Allaah ugu deeqay. Xarakada Mujaahidiinta Al-Shabaab waxay dadka Soomaaliyeed ugu baaqeysaa -dal iyo dibad meeshii ay joogaanba- inay kasoo horjeestaan is-afgaradkan sharci darada ah si la mid ah sidii ay uga dhiidhiyeen heshiiskii dhexmaray Itoobiya iyo maamulka Somaliland.
About The Author
