Booliiska dowladda Kenya ayaa markale wajahaya eedaymo kale oo la xiriirta kiis si wayn hadal-hayn uga dhaliyay gudaha waddankaasi, markii maydkiisa saldhig booliis oo kuyaal Mombasa laga helay wiil dhalinyaro ah.
Ehellada wiilka maydkiisa la helay ayaa sheegay inay ku waayeen magaalada Nairobi, waxaana goor dambe isagoo mayd ah laga helay saldhig Booliis oo kuyaal magaalada Mombasa ee dalka Kenya.
Ilo wareedyo ayaa sheegay in maydka wiilkan oo lagu magacaabi jiray Simon Warui jirkiisa lagu arkay dhaawacyo qoorta iyo gacmaha.
Qoyskiisa ayaa laga soo xigtay in Warui Axadii lagu arkay Umoja I oo ka mid ah xaafadaha magaalada caasimadda Nairobi, kaddib na laga soo sheegay saldhigga Booliska ee Kamukunji.
Xaaskiisa ayaa sidoo kale sheegtay in saddex maalmood kaddib uu taleefoon ka soo wacay nin waardiye ah oo ka tirsan kaniisad kutaal Nkrumah, kaasi oo ku wargeliyay haweenaydaasi in Warui laga sii dajiyay saldhigga Dhexe ee Booliska Mombasa.
Dhimashada yaabka leh ee ku timid ninkan Kenyanka ayaa dhalisay su’aalo dul wareeganaya Booliiska Kenya, baaritaano uu sameeyay cisbitaalka guud ee Mombasa ayaa lagu ogaaday in Warui uu u dhintay ogsajiin la’aan, iyadoo ay ka muuqdeen dhaawacyo kasoo gaaray qoorta, gacmaha, iyo sidoo kale faraha oo madoobaan.
About The Author
