War rasmi ah oo kasoo baxay dowladda Kenya ayaa lagu sheegay in laga cabsi qabo weeraro hor leh oo lala beegsado dadka Kenyaanka ah iyo Ajaanibta ku sugan qaar katirsan magaalooyinka waaweyn ee wadanka Kenya.
Saraakiisha Booliska Kenya ayaa sheegay in xaalad cabsi leh ay ka jirto magaalooyin katirsan gobollada Lamu iyo Waqooyi Bari oo loola jeedo gobolka gumeysiga kujira ee (NFD), Kenya waxay sheegtay in ay heleen macluumaadyo sheegaya weeraro culus oo Al Shabaab ku qaadi doonto dhowr magaalo.
Dowladda Kenya waxay muujisay walaac ah in dadka Kenyaanka Kirishtaanka ah iyo kuwa ajaanibta ah ay bartilmaameed sahlan unoqdaan ciidamada Xarakada Al Shabaab waxayna kula talisay ajaanibta in ay u baqoolaan dhanka magaalada Na’irobo.
Warbaahinta maxalliga Kenya oo soo xiganaysa saraakiisha Booliska ayaa sheegtay in Barakac xooggan uu ka bilaawday sedax gobol oo kala ah Gobolka Xeebta, Waqooyi Bari, iyo Lamu, boqolaal ajaanib ah ayaa la sheegay in gelinkii dambe ee shalay ay ka baxeen magaalooyinka loo dalxiis tago ee Lamu iyo xeebaha magaalada Bombaasa.
Baqdinta ugu daran ayay Kenya ka muujinaysaa magaalada Mandheera ee kaabiga ku heysa degmada Beled Xaawo ee gobolka Gedo oo dagaalyahanada Al Shabaab ay dhowr mar ka fuliyeen weeraro dhiig badan ku daatay.
About The Author
