Wararka ka imaanaya magaalada Nairobi ee dalka Kenya, ayaa sheegaya in dab ka kacay dhisme kuyaal xaafadda South C ay ku dhinteen carruur kasoo jeeda Soomaaliya oo degganaa gurigaasi.
Wargayska The star ee kasoo baxa Kenya ayaa sheegay in dabka uu sababay dhimashada 3 caruur ah, kuwaas oo ay da’doodu u dhaxaysay 2 ilaa 5 sanno, dabka ayuu sheegay in uu si gaar ah uga kacay dabaqa koowaad dhisme lagu magacaabo Huda Apartment oo kuyaal xaafadda South C ee magaalada Nairobi.
Booliiska waddanka Kenya ayaa dhanka kale sheegay in uu dabku si kadis ah u kacay, balse ma bixin faahfaahin dheeraad ah, caruurta dabka ku dhimatay ayay tilmaameen inay walaalo ahaayeen.
Dhanka kale, Soomaalida ku dhaqan Kenya, ayaa soo sheegay in dabka uu ka dhashay koronto, kana kacay dhisme dabaq ah oo ay degganaayeen qoys Soomaaliyeed, halkaas na ay ku nafwaayeen saddex carruur ah oo uu dhalay nin lagu magacaabo Axmed Nuur.
Dadka ka badbaaday dabka kacay ayay sheegeen inay ka mid tahay hooyada qoyska iyo carruur ay dhashay, kuwaasi oo laga soo tuuray daaqadda guriga, carruurta dabka ku dhimatay ayay sheegeen inay albaabadu kusoo xirmeen, sidaas na ay ku neef-qabatimeen qiiqa, ugu dambayna geeriyoodeen.
Kenya waxay maalmihii u dambeeyay maritelinaysay dhacdooyin dab ah oo gallaaftay nolasha dhowr xubnood, maalmo ka hor ayay ahayd markii sidan oo kale ay laba qof ugu dhinteen dab ka kacay dhisme dabaq ah oo ku yaalla xaafadda Kawangware ee Nairobi.
Bishii May ee aanu soo dhaafnay ayay ahayd markii ugu yaraan 15 xubnood dhinteen kaddib dhacdooyin dab ah oo ka kacay xaafadaha ay danyartu ku badanyihiin ee Kibera, Mukuru Kwa Njenga, iyo Mathare ee caasimadda Nairobi.
About The Author
