Ciidamada millatariga dowladda Itoobiya ayaa lagu eedeeyay inay dileen ugu yaraan 46 qof oo rayid ah, kadib markii ay weerareen magaalaada Birakat oo kutaal waqooyiga Mecha,gaar ahaan aagga Gojjam ee ismaamulka Amhara.
Weerarka oo dhacay Isniintii ayaa sidoo kale lasoo warinayaa in tirada dadka la dilay ay ka badan karto 50 xubnood, waxayna dadku isugu jiraan Carruur, haween iyo dad waayeel ah sida lagu sheegay warbixin ay daabacday mid ka mid ah warbaahinta Itoobiya.
Wadaaddo Kiristhaan ah ayaa sheegay inay heleen magacyada qaar ka mid ah dadka rayidka ah ee la khaarajiyay, sidoo kale warbaahin lagu magacaabo Anchor Media – oo ah warbaahin ka faalloota arrimaha dalka Itoobiya ayaa sheegtay inay heshay magacyada 46-ka qof ee la dilay, balse ay sheegtay inaysan u shaacin sabab aan la cayimin darted.
Warar kale oo deegaanka Axmaarada laga helayo ayaa sheegaya in weerarka ciidamada millatariga nidaamka Abiy uu ahaa mid toos u beegsanayay dadka rayidka ah, waxaana la sheegay in ciidamadu guryaha uga dhaceen dadka ay dilayeen, waddooyinkana ay maydadkooda soo dhoobeen.
Warbaahinta taabacsan mucaaradka waxay sheegtay in ciidamada dowladda xabashida lagu eedeeyay inay u adeegsanayaan xasuuqa dad rayidka xeelad cabsi gelin ah oo ay ku wiiqayaan taageerada jabhadda Fano, Sannadkii hore ayaa la diiwaan geliyay dhacdooyin tan la mid ah oo ka dhacay Merawi iyo deegaano kale oo ka tirsan gobolka Amxaarada ee Itoobiya.
About The Author
