Waxaa iska soo daba dhacaya wararka la xiriira duqaymaha diyaaradeed ee ay gaysanayaan ciidamada dowladda xabashida Itoobiya, kuwaas oo ka dhacaya gobolka Axmaarada ee dhaca waqooyiga dalka Itoobiya.
Inta la xaqiijiyay ugu yaraan shan xubnood oo shacab ah ayaa ku dhintay duqayn dhanka cirka ah oo diyaarad Drone ah ay ku beegsatay gaari nooca Ambalaaska ee lagu daabulo dhaawacyada, sida ay soo sheegeen dad goob joog u ahaa dhacdadan.
Duqayntan diyaaradeed ayaa ka dhacday magaalada Wogel Tena oo dhacda waqooyi bari gobolka Axmaarada, waxaana la xaqiijiyay in dadka dhintay ay isugu jiraan farmashiiste, dareewalkii waday gaariga iyo shaqaale ka agdhawaa halka ay wax ka dhaceen.
Sidoo kale duqaytan diyaaradeed ee laga soo calaamadiyay magaalada Wogel Tena, waxaa ku dhaawacmay saddex xubnood oo kale, kuwaas oo uu ka mid yahay madaxa cisbitaal maxalli ah oo kuyaal magaalada, duqayntan ayaana dhacday toddobaadkii hore, balse isgaarsiinta oo ah mid ay dowladda dhexe goysay ayaa keentay in maanta la xaqiijiyo khasaaraha ka dhashay dhacdadan.
Ciidanka millatariga dowlada xabashida Itoobiya ayaa sare u qaaday duqaymaha diyaaradeed ee ay ka gaysanayaan gobolka Axmaarada, halkaas oo ay sheegaan inay ku ugaarsadaan ciidamada jabhadda xoraynta dadka Axmaarada.
About The Author
