Wararka ka imanaya koonfurta Itoobiya ayaa sheegaya xasuuq ba’an oo ciidanka Xabashida Itoobiya ay u geysteen dad shacab ah oo ku dhaqan aagga Goma, gaar ahaan degmooyinka Zayse Wezeka iyo Zayse Denbel.
Xildhibaan ka tirsan baarlamaanka dawaaqiidda federaalka Itoobiya iyo qaar ka mida dadka deegaanka oo la hadlay warbaahinta ayaa sheegay in ugu yaraan 16 qof ay ku dhinteen, hanti badanna ay burburtay, ka dib iska horimaad dhex-maray ciidanka Xabashida Itoobiya iyo dad shacab ah.
Abraham Amoshe, oo ah xildhibaan metala deggaanka Zayse, ayaa sheegay in rabshaduhu ay bilowdeen dabayaaqada usbuucii hore, wuxuuna tilmaamay in ciidamada ku lugta leh gummaadka shacabka ay isugu jiraan booliska rabshadaha ka hortagga ee gobolka, booliska caadiga ah ee aagga, maleeshiyaad, iyo askar horey uga tirsanayd ciidanka Xabashida Itoobiya.
Warar is-khilaafsan ayaa kasoo baxaya sababta dhalisay rabshadahan, balse xildhibaanku wuxuu ku eedeeyay maamulka gobolka in iyagu ay soo abaabuleen hawl-galkan isla markaana ay xasuuqeen dhalinyaro shacab ah oo dhagxaan tuuraysay. Isagoo intaa raaciyey in ciidamada ammaanku ay saldhigyo ka samaysteen iskuullo iyo xarumo caafimaad, taasoo uu ku tilmaamay mid khatar ku ah shacabka deggaanka.
Dhimashada iyo burburka hantida kasakow, waxa kale oo warbaahinta maxalliga ah ee Itoobiya ay xaqiijisay in la afduubtay dad ka badan 100 qof, kuwaas oo ilaa hadda aan la garanayn meel ay ku sugan yihiin.
Wararka ayaa tilmaamaya in dad badan oo kale la xir-xiray, qaar kalena ay duurka u baxsadeen, iyadoo dad badan oo barakacayaal ah la sheegay inay wajahayaan xaalad bini’aadantinimo oo adag, oo ay ka mid yihiin cunto la’aan, biyo la’aan iyo hoy la’aan.
About The Author
