Cudur halis ah oo si fudud ku faafa ayaa maalmihii lasoo dhaafay si wayn ugu fiday magaalooyin dhaca koonfurta, bartamaha iyo qaybo ka mid ah waqooyiga Soomaaliya.
Cudurkan oo Soomaalidu u taqaan Gowracatada afka qalaad na lagu dhaho (Diphtheria), ayaa kiisaskiisii ugu horreeyay la arkay sannadkii hore balse dib ayuu usoo laba kacleeyay maalmihii lasoo dhaafay, dad badanna kusoo ritay gobollo kuyaal waddanka.
Cudurka ayaa sida la sheego ku dhici kara qof walba, balse dadka ugu badan ee halista ugu jira cudurkaas ayaa lagu sheegay caruurta shanta sano ka yar, waana xanuun ku dhaca hawa-mareenka oo calaamadaha lagu garto waxaa ka mid ah, qandho, cunaha oo xanuuna qofka iyo qanjirada qoorta oo barara, waxa sidoo kale la sheegay in cudurka uu ku dhaco maqaarka inkastoo uusan u badnayn.
Cisbitaallada kuyaal magaalada caasimadda Muqdisho ayaa maalmihii lasoo dhaafay qaabilay boqollaal qof oo uu xanuunkan soo ritay, una badan caruur laga keenay degmooyinka kala ah Kaaraan Yaaqshiid iyo Dayniile oo ka tirsan gobolka Banaadir iyo gobollo kale sida Baay iyo gobollada dhexe, dad badan ayaa lasoo wariyay in saacadihii lasoo dhaafay ay u geeriyodeen xanuunkan, halka boqollaal kalena u jiifaan.
Hay’adaha caafimaadka iyo dhakhaatiirtu waxay sheegeen in cudurka uu si fudud ku gudbo, oo waxay dadku isku qaadsiin karaan qufaca, waxay sidoo kale sheegeen in uu jiro ka hortag iyo daweyn lagula tacaalo xanuunka sida in bukaanku tallaal qaato.
About The Author
