Dab xooggan oo khasaare hantiyeed oo baaxad leh geystay ayaa saqdii dhexe ee xalay ka kacay suuqa Gobonimo ee xaafadda Idaacadda oo ah suuqa labaad ee ugu weyn magaallada Hargeysa ee xarunta maamulka gobollada waqooyi ee la baxay Somaliland.
Dabkan ayaa saamayn ballaaran ku yeeshay qaybo ka mida suuqaasi, waxaana damintiisa ka qayb-qaatay dadweynaha magaallada oo gurmad xooggan muujiyey.
Ilo-wareedyo ayaa sheegaya in qoysas fara badan oo danyar ah oo suuqaasi ka ganacsan jiray kuna lahaa meherado yar yar, ay ka mid ahaayeen dadkii hantidoodu ku basbeeshay dabkaasi.
Suuqan oo dhabarka ku haya xayn-daabka idaacadda ku hadasha afka maamulka riddada Somaliland ayaan ilaa hadda la xaqiijin waxa dhaliyey dabkaasi, kaas oo demintiisu ay qaadatay muddo ku dhow saddex saacadood. Waxaanay wararku tibaaxayaan in suuqaasi aanu lahayn waddooyin ku filan oo laga fidin karo gurmadka deg-degga ah.
C/Raxmaan Muuse oo ka mid ah ganacsatada ay hantidoodii ku basbeeshay suuqan ayaa isagoo dul-taagan meheraddiisii oo holcaysa ka war-bixiyey baaxadda khasaare ee ka dhashay dabkaasi, waxaanu yiri:
Ganacsade kale oo lagu magacaabo Khadar oo isna warbaahinta la hadlay ayaa sheegay in saddex meheradood oo uu lahaa ay ku shuf-beelleen dabkaasi xalay ka kacay suuqa Idaacadda ee magaallada Hargeysa.
Axmed Maxamed Sawaaxili oo ah taliyaha dab-demiska maamulka la baxay Somaliland ayaa warbaahinta u xaqiijiyey in dabkaasi uu geystay khasaare baaxad leh, balse aanay jirin wax dhimasho iyo dhaawac ah oo soo gaaray dadweynaha, isagoo baaxadda dabkaasi ku qiyaasay inuu is-haystay ugu yaraan ilaa 1KM.
C/raxmaan Maxamed Cabdillaahi (Cirro) oo ah madaxa maamulka ridda Somaliland oo saaka gaaray suuqan xalay basbeelay ayaa sheegay in dabkani uu marar badan soo noqnoqday isla markaana burburiyey halbawlahayaashii dhaqaallaha.
Gubashada suuqyada waaweyn ee magaallooyinka Soomaaliyeed oo sannadihii u dambaysay aad u soo laalaabtay ayaan ilaa hadda la aqoonsan asbaabaha dhabta ah ee dabkaasi dhaliya.
Laba sano ka hor ayay ahayd markii sidan oo kale u gubtay suuqii ugu weynaa magaallada Hargeysa ee Waaheen, kaas oo hantidii ku basbeeshay lagu qiyaasey $ 1.5 Bilyan oo Doollar.
About The Author
