Xiisado colaadeed ayaa ka taagan gobolka Axmaarada ee dhaca waddanka Itoobiya, kaas oo salka ku haya go’aankii dhowaan ay dowladda Itoobiya ku kala dirtay ciidamada liyuu booliska ee maamul goboleeyada xabashida.
Iska hor’imaadyo hubeysan oo u dhaxeeya ciidamada Liyuu booliska Axmaarada iyo maleeshiyaadka jabhadda hubeysan ee Faano oo dhinac ah iyo ciidamada millatariga xabashida, ayaa ka dhacay qaybo ka mid ah gobolka Axmaarada.
Isku dhacyada xooggooda ayaa laga soo tabiyay magaalada Dabre-birhaan ee dhacda gobolka Axmarada, halkaas oo ay isku fara saareen ciidamada millatariga xabashida iyo kuwa deegaanka Axmaarada ee isugu jiray ciidamada booliska gaarka ah iyo Faano.
Ilo wareedyo ciidan oo magacyadooda qariyay aya xaqiijiyay in iska hor’imaadyada ka dhacay Axmaarada ay ku dhinteen ugu yaraan 2 askari, halka ay isku dhacyadas hakad galiyeen isku socodka dadka iyo midka gaadiidka.
Ciidamada Liyuu booliska Axmaarada iyo kuwa Faano oo ka caraysan go’aanka kasoo baxay dowladda xabashida ayaa dagaalkan kaga hor tagay ciidamada millatariga oo la doonayay in lagu wareejiyo taliska ciidanka ee maamulka Axmaarada.
Iska hor’imaadyadan ka dhacay gobolka Axmaarada ayaa kusoo beegmaya xilli uu cirka isku sii shareeray diidmada ay qowmiyadda Axmaaradu ka muujinayso go’aankii uu Abiye ku kala diray ciidamada Liyuu booliska Killiyada ee waddankaas, dagaalkan ka hor waxay Axmaaradu sameeyeen dibadbaxyo ballaaran oo ay kaga soo horjeedaan go’aankan kasoo baxay dowladda dhexe.
About The Author
