Dagaallo culus oo u dhaxeeya maleeshiyaadka jabhadda hubeysan ee Fano iyo ciidanka millatariga dowladda xabashida Itoobiya, ayaa ka socda qaybo ka mid ah ismaamulka Axmaarada.
Warbaahinta maxalliga ah waxay soo sheegtay in dagaallada hadda socda ay soo billowdeen axaddii lasoo dhaafay, dhowr deegaan oo ka tirsan ismaamulkana uu si rasmi ah uga socdo.
Goobjoogeyaal ayaa soo wariyay in deegaannada labada ciidan ay ku dagaallameen ay ka mid tahay Armachiho, Amhara Saynt oo ka tirsan Wollo, Lasta iyo Tegede, iyo deegaano kale oo muhiim u ah ciidanka millatariga.
Warbaahinta taageersan Fano ayaa dhankeeda sheegtay in maleeshiyo aad u hubeysan oo jabhadda ka tirsan ay weerar ballaaran ku qaadeen magaalooyin badan oo ka tirsan gobolka Shewa ee dhaca ismaamulka Axmaarada ee waqooyiga Itoobiya.
Dhanka kale, warbaahinta gudaha Itoobiya waxay sheegtay in dawladdu qorshaynayso in gobolka Axmaarada ka fuliso duqaymo ka dhan ah maleeshiyada Faano, maadaama ay hadda jabhaddan gacanta ku hayso qayb aad u badan oo ka tirsan maamulka gobolka.
Maamulka Abiy ayaa qorsheynayo in gobolkan uu geeyo diyaaradaha qumaatiga u kaca iyo kuwa aan duuliyaha laheyn ee Drones-ka, si ay u beegsadeen Fano kaddib markii ciidamada millatariga lagu jabiyay dagaallada dhanka dhulka ah, taliyeyaal dhowr ah oo aan magacyadooda la sheegin oo taliska ciidanka millatariga ka tirsan ayaa lasoo wariyay inay wajihi doonaan xarig suurtagal ah oo la xiriira guuldarrooyinka soo noqnoqday ee ku dhacay ololaha militariga ee uu Abiy Axmed kaga dhawaaqay gobolka Axmaarada.
About The Author
