Maamullada daba-dhilifyada ah ee isku magacaabay Puntland iyo Jubbaland ayaa soo saaray war-saxaafadeedyo ay ku ayyideen bayaan wada-jir ah oo magaalada Muqdisho ay shalay kasoo saareen golaha mucaaradka riddada ee la baxay “Madasha Samatabixinta.
Waxay sheegeen inay ka walaacsan yihiin xaaladda khatarta ah ee dalka uu geliyey madaxa kooxda Villa Somaliya Murtad Gurguurte iyo sida uu usii xoogaysanayo jahwareerka siyaasadeed iyo hubanti la’aanta ku timid geeddi-socodka wax ay ugu yeereen dhismaha hannaanka dowladnimo.
Labadan maamul waxa kale oo ay ka dhawaajiyeen in Xasan Gurguurte iyo Kooxdiisu ay kala qoqob iyo kala qaybin ku dhex abuureen bulshada, isla markaana ay ku mashquuleen dano gaar ah oo uu ku dhibaateeyey dadka Soomaaliyeed.
Waxa kale oo ay shaaciyeen in Xasan Sheekh Maxamuud uu si ku talo-gal ah dhagaha uga furaytay baaqyadii loo jeediyey oo dhan, tallaabadaas ayay ku tilmaameen nasiib-darro horseedday mugdi badan oo hareeyey ayay yiraahdeen mustaqbalka iyo midnimada dalka Soomaaliya.
Waxay sheegeen inay cambaaraynayaan siyaasadda Gurracan ee Gurguurte uu ku faragelinayo kuna kala qaybinayo hey’adaha iyo ururada u midoobay wax ay ku sheegeen toosinta siyaasadda kooxda Villa Somaliya, taas oo ku salaysan ayay yiraahdeen rabitaanka dano gaar ah oo ay Soomaaliya horey usoo eedday, isla markaana ay ka dhaxashay burbur amni iyo mid siyaasadeed.
War-murtiyeedyada labadan maamul ee ay kala hoggaamiyaan Axmed-madoobe iyo Saciid Cabdilaahi Deni ayaa si buuxda loogu taageeray baaq ay soo saareen golaha mucaaradka ee la baxay “Madasha Samatabixinta, waxaanay sheegeen inay diyaar u yihiin dadaal kasta oo dalka looga badbaadinayo Xasan Gurguurte iyo kooxdiisa.
Shalay ayay ahayd markii siyaasiyiinta mucaaradku ay soo saareen go’aanno culus iyo digniinno ka dhan ah kooxda Villa Somaliya, iyagoo ku baaqay in la isugu yimaaddo shir deg-deg ah oo ay sheegeen in lagu samatabixinayo dalka, kaas oo qayb ay ka yihiin ayay yiraahdeen maamul-goboleedyada Puntland iyo Jubaland.
About The Author
