Wararka ka imaanaya waddanka Sierra Leone ee dhaca galbeedka qaaradda Africa ayaa sheegaya in xaalad kacsanaan ah ay ka taagan tahay caasimadda dalkaasi ee Freetown, halkaas oo ay weerar ku ekeeyeen kooxo hubeysan.
Dowladda Sierra Leone waxay ku dhawaaqday bandow ay shaacisay inuu ka hirgeli doono waddanka oo dhan ah, kaddib markii rag hubeysan ay weerar ku qaadeen xero ciidan oo ku taalla caasimadda Freetown, xilli dalkan bilihii lasoo dhaafay uu marti gelinayay rabshado dhanka siyaasadda ah.
Dad goobjoogeyaal ah ayaa wakaaladda wararka ee AFP u sheegay inay maqlayeen rassaas xooggan iyo qaraxyo is xig-xiga oo ka dhacaya magaalada caasimadda, tan iyo wixii ka dambeeyay duhurnimadii maanta, muuqaallo iyo sawirro lagu faafiyay baraha internet-ka ayaa muujinayay qiiq badan oo ka baxayay waddooyinka.
Dowladda Sierra Leone waxay sheegtay inay ciidankeeda iska caabiyeen weerar dhowr jiho ah oo kaga yimid rag aad u hubeysan, kuwaas oo beegsaday saldhigga Wilberforce oo ay leeyihiin ciidanka militariga, waziirka warfaafinta ee xukuumadda ayaa dhankiisa dadka ugu baaqay inay guryahooda ku nagaadaan inta xaalada laga dajinayo.
Waziirka arrimaha gudaha ee Sierra Leone David Taluva ayaa dhankiisa wakaaladda wararka ee Reuters u sheegay in kooxdii weerarka soo qaaday ay sidoo beegsadeen xero boolis, rassaastiina ay ka dhamaatay, waxayna ciidanka kooxdaasi qabsadaan hub badan oo ay wateen ciidamada booliska.
Xaaladda siyaasadeed ee waddanka Sierra Leone ayaa aad u kacsan tan iyo markii madaxweynaha dalkaas, Julius Maada Bio dib loo doortay bishii June, natiijadaas oo uu si wayn u diiday musharaxa ugu weyn ee mucaaradka.
About The Author
