Magaalooyin dhowr ah oo ka tirsan waddanka Kenya waxaa maanta ka billowday dibadbaxyo ballaaran oo looga soo horjeedo sicir bararka ka taagan magaalooyinka waddankaas, halka magaalooyinka qaar ay ka dhaceen isku dhacyo gacmaha la iskula tagay oo u dhaxeeyay ciidamada booliska iyo dibadbaxayaasha.
Dibadbaxyada ugu ballaaran ayaa ka dhacay magaalada Nairobi ee caasimadda u ah waddanka Kenya kuwaas oo ay hoggaaminayeen kooxaha mucaaradka ku ah xukuumadda talada haysa waxayna Kenyaan,ku ka cabanayeen sicirka baahsan ee ku fiday magaalooyinka waddanka.
Ciidamada booliska xukuumadda Nairobi oo markii horeba heegan buuxa la galiyay ayaa dadka kacdoonka wada u adeegsanaya sunta dadka ka ilmaysiisa, sida lagu arki karo muuqaallo ay faafisay warbaahinta maxalliga ah, isku soo baxyada caasimadda Na;robi ayaa sababay in uu hakad galo isku socodka dadka iyo midka gaadiidka iyadoo ay badi xirnaayeen goobaha ganacsiga.
Magaalooyinka ay isku soo baxyadu ka dhaceen waxaa ka mid ah magaalada Kisumu ee gobolka Nyanza, halkaas oo ay ka dhaceen bannanbaxyo rabshado wata oo ay gacmaha iskula tageen kacdoon wadeyaasha iyo ciidanka booliska.
Inta la xaqiijiyay ugu yaraan labo askari oo ka mid ahaa ciidamada booliska Kenya ayaa ku dhaawacmay isku dhacyo dhex maray dibadbaxayaasha iyo ciidamada ammaanka halka lasoo wariyay in mudaaharaadeyaashana ay waxyeello kala duwan soo gaartay, waddooyinka magaalada Kisumu waxaa lagu arkayay gaadiidka deg deg ah oo daabulayay dhaawacyadii ka dhashay bannaanbaxyada.
Ciidamada booliska Nairobi ayaa xabsiga dhigay dibadbaxayaal badan kuwaas oo ka qayb qaadanayay dibadaxyada ka dhanka ah dowladda ee looga soo horjeedo sicirka ka jira magaaalooyinka waddankaas.
About The Author
