Wargeyska New York Times ee kasoo baxa dalka Mareykanka ayaa markii ugu horraysay banaanka soo dhigay macluumaadyo muujinaya qaabkii uu udhacay weerarkii dhagarta ahaa ee lagu dilay Ismaaciil Haniya hoggaamiyihii kooxda Xamaas.
Warbixin uu wargeysku daabacay ayuu ku sheegay in aysan jirin wax duqeyn ah oo lagu dilay Haniya balse dilkiisa loo adeegsaday walxaha qarxa oo lagu diyaariyay gurigii uu ka deganaa magaalada Dahraan ee caasimadda Iiraan.
Sida ay baaritaannada hordhaca ah muujinayaan Yahuudda ayaa miino kusii aastay guriga loo yaqaan (Guriga Martida) oo ay gacanta ku hayaan saraakiil katirsan ciidanka ilaalada kacaanka dowladda shiicada Iiraan.
Goobta uu dilku ka dhacay ee lagu qariyay walxaha qarxa waxay dhacdaa waqooyiga magaalada Darhaan waxaana mudadii labada bilood aheyd ee shirqoolka lamaleegayay sheedda kala socday sirdoonka Yahuudda.
Ilo wareedyo ayaa New York Times usheegay in markii Haniya lagu hubsaday guriga Rumuut lagu qarxiyay miinadii lagusii diyaariyay guriga martida ee dowladda Shiicada Iiraan.
Macluumaadyadan soo baxay ayaa meesha ka saaraya warar shalay soo baxay oo sheegayay in diyaarad Drone ah ay duqeysay gurigii uu deganaa Haniya.
Arrintan ayaa muujinaysa sida sirdoonka Yahuudda uu galaangal xooggan ugu dhax leeyahay mas’uuliyiinta ugu sarraysa dowladda Shiicada Iiraan.
About The Author
