Ugu yaraan 4 qof oo rayid ah ayaa lagu dilay, in ka badan 10 qof-na waa lagu dhaawacay duqayn diyaaradeed oo bartamaha usbuucii lasoo dhaafay ka dhacday deggaan dhaca gobolka Amxaarada ee dalka Itoobiya, gaar ahaan waqooyiga Wollo.
Haweenay uur leh ayaa la sheegay inay ka mid ahayd dadka dhintay, waxaanay wararku tibaaxayaan in duqayntaasi ay fuliyeen diyaaradaha Drones-ka ee maamulka Abiy Axmed, kuwaa oo beegsaday xarunta caafimaadka ee magaalada Sanka ee degmada Gubalafto.
Mid ka mida shaqaalaha caafimaadka oo goob-joog u ahaa dhacdadaasi ayaa warbaahin laga leeyahay dalka Ingiriiska u sheegay in diyaaradda drone-ku ay ugu horreyn ku dhufatay “Qolka Lambar 5,” oo ah qeybta ugu weyn ee bukaannadu ay jiifeen.
“Indhahayga ayaan ku arkay dhimashada afar bukaan iyo daryeelayaal,” ayuu ninkaasi u sheegay warbaahinta, isagoo intaas ku daray in saddex ka mid ah dadka dhintay ay ahaayeen waalidiin goobtaasi u joogay daryeelka carruurtooda.
In ka badan toban qof ayaa ku dhaawacantay duqayntaasi, oo uu ku jiro ilmo lix jir ah oo uu dhalay mid ka mida shaqaalaha caafimaadku. Halka sideed ka mid ah dadka dhaawacmay ay ahaayeen shaqaalaha xarunta caafimaadka.
Dadka dhaawacmay ayaa labo maalmood kadib markii uu dhacay weerarkaasi oo ku beegnayd Isniintii lasoo dhaafay loo daad-gureeyey cisbitaalka Woldia, kadib markii waddooyinka loo furay gaadiidka. Waxaanay wararku tibaaxayaan in saddex ka mid ah lagu sameeyey qalliin deg-deg ah.
Dadka deegaanka ayaa sheegay inaysan jirin wax iska-hor-imaad ah oo gudaha magaalada Sanka ku dhex maray ciidamada dowladda iyo maleeshiyaadka Fano xilligii duqeyntu dhacday, balse dagaallo culus ayaa ka dhacay deegaannada ku hareeraysan Woldia, gaar ahaan meel u dhow Tikur Wuha.
About The Author
