Dowladda Federaalka Itoobiya ayaa la sheegay inay ciidamo fara badan ay u rarayso gobolka Tigray ee waqooyiga Itoobiya, xilli uu qalalaasaha siyaasadeed ee gobolkaasi uu cirka isku sii shareerayo, mararka qaarna uu sababo iska-hor-imaadyo militari.
Maleeshiyaad gacan-saar la leh maamulka Abiy Axmed ayaa saacadihii lasoo dhaafay baahiyey sawir muujinaya mid ka mida baabuurta gaashaaman ee ciidanka difaaca Itoobiya oo sida la sheegay loo raray una jihaysan dhinaca gobolka Tigrey.
Mid ka mida dhacdooyinkii ugu dambeeyey ayaa ka dhcay deggaanka Mehoni oo ku taal Koonfurta Tigrey, halkaas oo maleeshiyaadka TPLF ay rasaas ku fureen kooxo dhalinyaro ah oo xiriir la leh maleeshiyaadka la aaminsan yahay in abaabulkooda uu Abiy Axmed ka dambeeyo. Waxaana rasaastaasi ku dhaawacmay 5 qof oo ka mid ahaa dhalinyaradaasi.
Sida ay sheegeen ilo-wareedyo, oo ay soo warisay Borkena, maleeshiyaadkan rasaasta furay waxay xilligaasi ku gudo-jireen hawlgal ay rabeen inay ku xiraan Kornayl Halefom Mehari, oo la sheegay inuu ka goostay maleeshiyaadka mucaaradka TPLF ee daacadda u ah garabka uu hoggaamiyo Debretsion.
Girmay Tsegay (Geermi Segeey), oo ah Ku-xigeenka Madaxa Amniga ee maamulka maqaar-saarka ah ee Aagga Koonfureed ee Tigray, oo waraysi siiyay Ethiopia Media Services, ayaa sheegay in tallaabooyin qasab ah ay wadaan maleeshiyaadka Debretsion isla markaana ay isku dayayaan in deggaannada Koonfurta Tigray ay taageero ka heli karaan dowladda Ereteriya.
Haddii ciidamada militariga ee dowladda federaalka ee la sheegay in la sheegay in loo daad-guraynayo gobolka Tigray ay sii kordhiyaan xiisadda, waxaa suuro-gal ah ayuu yiri wargeyska Borkena isku dhac militari oo mar kale ka dhex-qarxa jabhadda TPLF iyo ciidanka Xabashida Itoobiya, isla markaana dagaalku uu ku fido dowlado kale oo gobolka ah oo ay ku jirto Eretriya.
About The Author
