Xilli waddanka Itoobiya ay ka holcayaan dagaallo culus oo u dhaxeeya maleeshiyaadka Axmaarada ee Fano iyo millatariga dowlada xabashida, ayay markii ugu horraysay xukuumadda Addis ababa ku dhawaaqday in magaalooyin iyo deegaanno looga qabsaday dagaallada socda.
Agaasimaha sirdoonka dowladda Itoobiya oo ay xukuumadda Abiye Axmed u wakiilatay la socodka dhaqangelinta xaaladda degdegga ah ee ay kusoo rogeen gobolka, ayaa Faano ku eedeeyay inay doonayso isku day afgambi oo ka dhan ah ismaamulka Amhara iyo dowladda dhexe ee uu fadhigeedu yahay Addis ababa.
Sarkaalkan ayaa wakaaladda wararka ee Reuters u sheegay in maleeshiyaadka hubeysan ee Fano ay u suurtagashay inay qabsadaan qaar ka mid ah magaalooyinka iyo deegaannada gobolka Axmaarada, welina la is horfadhiyo.
Inkastoo dagaallada ugu xooggan ay ka socdaan magaalooyinka Bahardar iyo Gonder oo ah kuwa ugu wayn gobolka Axmaarada, haddana waxaa jira isku dhacyo kale oo laga soo tabinayo deegaanno kale, halkaas oo ay dowladdu ku daadguraynayso ciidamo dheeraad ah.
Xukuumadda Addis ababa ayaa kacdoonkan ballaaran ee kaga yimid gobolka Axmaarada u aragta halis amni oo ka mug wayn tii Tigray, waxayna horay u sheegtay in maleeshiyaadka jabhadda Axmaarada ee Fano ay doonayaan inay inqilaab ku sameeyaan dowladda hadda ka jirta.
About The Author
