Wararka ka imanaya gudaha dalka Itoobiya ayaa sheegaya in ay sii xoogaysteen dagaallo culus oo muddooyinkii u dambeeyey, si gaar ah uga holcaayey gobolka Amxaarada, una dhexeeya ciidanka Xabashida Itoobiya iyo maleeshiyaadka amxaarada ee Fano.
Sida ay xoguhu tibaaxayaan jabhadda Fano ayaa Talaadadii shalay la wareegtay gacan-ku-heynta magaalada istaraariijiga ah ee Gashena, kadib markii ay go’doomiyeen magaalada muddo dhowr saacadood ah, sida ay xaqiijiyeen ilo-wareedyo ay soo xigatay warbaahinta Ethio News.
Magaalada Gashena oo ku taal jidka u dhexeeya magaalooyinka Woldia iyo Debretabor iskuna xirta deggaanno muhiim ah oo ku yaal gobolka Amxaarada, ayaa lagu xasuustaa dagaallo qaraar oo lagu kala furtay maryo dhiig leh oo ciidanka Xabashida iyo Kooxda TPLF ku dhex-maray xilligii uu socday dagaalkii lagu hoobtay ee 2020-kii ka qarxay gobolka Tigrey.
Ilo-wareedyo uu helay wargeyska Borkena ayaa sheegay in ciidamada dowladdu ay dhufeysyo adag ku lahaayeen gudaha magaalada Gashena, balse dagaal saacado badan qaatay kadib, maleeshiyaadka Fano ayay u suuragashay in xoog ay ku galaan, lana wareegaan dhammaan xaafadaha magaalada.
Waxaa fashil iyo guul-darro kusoo idlaaday isku dayo dhowr ah oo ay sameeyeen ciidanka Xabashida Itoobiya, kuwaas oo sida ay ku warrantay Ethio News, isticmaalay cutubyo farsamo iyo weerarro ay u adeegsadeen diyaaradaha aan duuliyaha lahayn si aanay magaaladu uga bixin gacantooda.
Tiro cayiman oo ku saabsan khasaaraha soo kala gaaray labada dhinac lama sheegin, sidoo kalena maamulka Abiy Axmed kama uu soo saarin wax war ah oo ku saabasn magaaladan loogu itaal-sheegtay ee gacanta ay ku dhigeen maleeshiyaadka amxaarada ee Fano.
About The Author
