Maleeshiyaadka jabhadda Axmaarada ee kacdoonka millatari kula jirta dowladda uu ra’iisul wasaaraha ka yahay Abiy Axmed, ayaa horumarro ka sameynaysa furimaha dagaal ee la isku hor fadhiyo.
Ilo wareedyo deegaanka ah ayaa soo sheegay in maleeshiyada Fano ay saacadihii lasoo dhaafay la wareegeen gacan ku haynta magaalooyin dhowr ah oo ay gacanta ku hayeen ciidamada millatariga xabashida.
Magaalooyinka gacanta usoo galay jabhadda fallaagada ah ee Faano waxaa ka mid ah sida lasoo wariyay, magaalada Merawi Gojjam oo 35 Km u jirta degmada Bahar-dar ee gobolka Axmaarada, halkaas oo ay taageereyaasha Fano sheegeen in lagu jabiyay oo laga kiciyay ciidanka Abiy Axmed.
Maleeshiyaad aad u hubeysan oo ka tirsan jabhadda Axmaarada, ayaa sidoo kale saacadihii lasoo dhaafay si buuxda ula wareegay sida lasoo warinayo magaalada lagu magacaabo Rema oo 200Km u jirta caasimadda Addis-ababa.
Warbaahinta taageerta Fano ayaa faafisay muuqaal muujinaya ciidamada Fano oo u dabaaldegaya magaalada ay kala wareegeen ciidamada milllatariga taabacsan ee Abiy Axmed ra’iisul wasaaraha u yahay.
Dhanka kale taageereyaasha jabhadda hubeysan ee Fano ayaa faafiyay muuqaal uu kasoo muuqanayo askari ka tirsan millatariga dowladda oo ay gacanta ku dhigeen, kaasi oo sheegaya in ciidamadii uu la howlgalayay ay waayeen 300 oo askari kaddib Fano ay kusoo weerartay saldhiggii ay ku sugnaayeen.
Jabhaddan kacdoonka millatari kula jirta xukuumadda fadhigeedu yahay magaalada Addis-ababa ayaa lasoo wariyay in markan ay ku howlan tahay maamul u samaynta magaalooyinka ay ka fara maroojisay ciidamada millatariga, toddobaadyadii dambe waxaa gacanta jabhaddan kusoo dhacay magaalooyin dhowr ah oo ay ka mid yihiin kuwa dhaca xuduudka ay wadaagaan Suudaan iyo Itoobiya.
About The Author
