Maleeshiyada jabhadda hubeysan ee mucaaradka Axmaarada ee Fano ayaa lagu eedeeyay weerar ka dhacay ismaamulkaasi, kaasi oo lagu dilay inka badan 8 qof oo ay ku jiraan saddex carruur ah iyo afduubka dhowr qof oo kale.
Weerarkan oo dhacay 15-ka July ayaa si gaar ah looga soo tabiyay deegaan lagu magacaabo Godo oo ka tirsan degmada Chilga ee bartamaha Gonder ee ismaamulka Axmaarada, marka laga soo tago khasaaraha dhimasho waxaa sidoo kale lasoo wariyay in dableydu gubtay guryo badan oo deegaankaasi ku yiillay.
Qof goobjooge ah oo magaciisa qariyay ayaa sheegay in weerarka uu ahaa mid ay fuiyeen maleeshiyaadka jabhadda Fano, isagoo xusay in siddeed qof lagu dilay weerarka, maleeshiyada weerarka fuliyay ayuu tilmaamay inay ka yimaaddeen deegaanka jaarka la ah ee Sharda, dhacdadaasi ayuuna ku tilmaamay inay ahayd mid argagax leh.
Goobjooge kale oo magaciisa qariyay ayaa isagana sheegay in khasaaraha ka dhashay weerarkan lagu beegsaday dadka rayidka ah uu gaarayo 10 qof oo dhimasho iyo dad kale oo uu xusay in aanan nolol iyo geeri lagu haynin, kuwaas oo gacanta u galay maleeshiyada weerarka soo qaaday.
Ilo wareedyo kale ayaa soo sheegay in weerarka lagu dhaawacay lix qof oo kale, kuwaas oo loola cararay cisbitaalka degmada Chilga, waxay sidoo kale tilmaameen in in guryo badan la gubay, dad badanna la afduubtay, ilaha laga soo xigtay xogtan waxay sheegeen in maleeshiyadu ay handadaad joogta ah ku hayaan dadka shacabka ah, masuuliyiinta deegaankana aysan waxba ka qaban dhibaatada haysata.
Ismaamulka Axmaarada ee Itoobiya wuxuu ka yahay gobollada uu sida wayn u saameeyay dagaallada sokeeye ee u dhaxeeya dadka Itoobiyaanka ah ee birta iska aslaya, waxaa sidoo kale daaalkaasi ka socda dagaallo xooggan oo u dhaxeeya jabhadaha hubeysan iyo ciidamada millatariga ee ka amar qaata xukuumadda talada haysa.
About The Author
