Dagaallada culus ee ka soconaya gobolka Axmaarada ayaa lasoo warinaya in lagu dilay askar iyo saraakiil fara badan oo ka tirsan ciidamada millatariga dowladda Itoobiya, waxaana ugu dambeeyay dagaallo ka dhacay gobolkaas oo la sheegay in lagu dilay General sare oo ka tirsanaa millatariga xabashida.
Warbaahinta taabacsan kooxda Axmaarada ee Fano, waxay sheegtay in dagaallo culus oo gobolkaasi ka dhacay ay ku dileen, General lagu magacaabi jiray Mohammed Ahmed, kaas oo ay sheegtay in uu ka mid ahaa generaallada sare ee millatariga Itoobiya ee hoggaaminayay ciidanka duullaanka kusoo qaaday gobolka Axmaarada.
Dadka taageersan kacdoonka millatari ee ay waddo kooxda lagy magacaabo Fano ayaa si wayn ugu dabaaldegay dilka Generaalkan oo ka mid ahaa saraakiisha hoggaaanka ciidanka Itoobiya, waxaana saacadihii u dambeeyay deegaanka Axmaarada is haysatay warka la xiriira dilka Generaalkan.
Dhanka kale, duqaymo ay gaysteen diyaaradaha aan duuliyaha lahayn ee ciidanka Abiye ayaa lasoo wariyay inay ku dhinteen daraasiin qof, duqaynta ugu xooggan ayaa lasoo waritay inay beegsatay dad rayid ah oo ku sugnaa deegaan lagu magacaabo Gawna ooka tirsan degmada Mojana Wedera oo dhacda Shewa ee gobolka Axmaarada, sidoo kale duqayn ka dhacday meel aan aagga ka fogayn oo lagu beegsaday gaari ay dad Axmaaro ah la socdeen ayaa lasoo wariyay inay ku dhinteen tobaneeyo qof.
About The Author
