Gudoomiyaha Degmada Mahadaay Oo Isku Day Dil Ka Badbaaday.

Cabdullaahi Max’med Xuseen Geeldoox oo ah guddoomiyaha degmada Mahadaay ayaa warbaahinta u sheegay in isaga iyo ciidamo uu watay lagu weeraray isgoyska Sanca ee degmada Yaaqshid magaalada Muqdisho, wuxuu sheegay in maleeshiyaadka loogu magac daray ‘Xasilinta Caasimadda’ ay rasaas ku fureen gaarigiisa islamarkaana ay jirdil ugeysteen isaga iyo ciidamo la socday.Guddoomiyaha Mahadaay ayaa xaqiijiyay in askari katirsanaa ciidamadiisa gaarka ah toogasho lagu dilay islamarkaana isaga inta gacmaha laga xiray jirdil loogu geystay Godka Jilacoow oo ku dhow madaxtooyada Villa Somalia.

Wuxuu sheegay in ciidamada ‘Xasilinta Caasimadda’ ay si xun ula dhaqmeen islamarkaana rasaas aan loo meel dayin ay ku fureen gaarigii uu watay oo lagu joojiyay isgoyska Sanca.

“Xalay safar ayaa Muqdisho ku soo galay, saacada marka ay aheyd lix saac, markii aan Isgoyska Sanca marayay oo aan rabay in xaafadeyda u gudbo waxaa i istaajiyay Ciidamada Xasilinta, waxay i weydiiyeen Aqoonsi ama ID CARD, waxaa u sheegay anaga Gobol ayaa jirnaa, dowlad goboleedka Hirshabeelle ka tirsanahay, wax Aqoonsi ah nalooma sameyn, waxaa Mobilkeyga ka tusiyay warqadii Digreetada aheyd ee la igu magacaabay, markaas ayaa la igu yiri askartada qoryaha ka qaad ee baaburka dhex dhig, markii intaas la i yiri ayaa askari ila socday uu hadlay, markaas ayay askartii kale rasaas nagu bilaabeen, hal askari waa iga dhintay, mid kalena waa  bad baaday”ayuu yiri Guddoomiyaha degmada Mahadaay.

Mas’uulkan katirsan maamulka ‘Hirshabelle’ ayaa ku eedeeyay saraakiisha dowladda Federaalka in si ula kac ah ay ubeegsadeen gaarigiisa wuxuuna ku goodiyay in uu dacwad ka furi doono ciidamada ku sugan isgoyska Sanca.