Madaxda iyo saraakiisha ciidamada Kenya ee ka howlgala gobolka NFD iyo saaxilka ay Muslimiintu leeyihiin ayaa wajahaya qal-qal dhanka amniga ah oo uga imaanaya dhanka Xarakada Mujaahidiinta Al-Shabaab.
Gudoomiyaha gobolka Mandheera Cali Roba oo waraysi siiyay wargeyska The Standard ee kasoo baxa dalka Kenya ayaa shaaca ka qaaday inuu wajahayo halis dhanka amniga ah, gobolkana ay kusii kordhayaan howlgallada ay fulinayaan ciidamada Xarakada Mujaahidiinta Al-Shabaab.
Wuxuu Gudoomiyuhu sheegay in isaga qudhiisa uu saddex jeer oo is xig xigta uu ka badbaaday isku day dil oo lagu doonayo in dunida lagu dhaafiyo, isku dayadaas oo ay fuliyeen ciidamo katirsan Xarakada Mujaahidiinta Al-Shabaab.
Qaar kamid ah howlgalladaas ayuu Roba sheegay in lagu dilay askar katirsan ilaaladiisa gaarka ah iyo saraakiil katirsan Police-ka dowladda Kenya.
Weerarada uu la kulmay waxay ahaayeen kuwa abaabulan, islamarkaana loo adeegsaday qaraxyo xoogan, balse Cali Roba wuu ka bad-baaday, waxaase weli uu dareemayaa cabsi xoogan iyo qal-qal joogta ah.
Amaanka Mandheera ayuu gudoomiyaha ku tilmaamay mid halis ah islamarkaana saacad kasta ay fishaan weeraro kaga yimaada dhanka Xarakada Mujaahidiinta Al-Shabaab.
Ciidamada Mujaahidiinta Al-Shabaab ayaa sii laba jibaaray howlgallada iyo weerarada qorsheysan ee ay ka fulinayaan gudaha dhulka Kenya ay gumeysiga ku heysato, dhawaan ayayna ahayd markii kolonyo ciidamo Kenyaati ah oo ku socdaalayay nawaaxiga Mpketoni la kulmeen weerar kamiin ah kaas oo looga dilay saddex askari, labo gaarina looga gubay.
About The Author
