Hoggaamiyaha mucaaradka Uganda, ninka lagu magacaabo Bobi Wine, ayaa sheegay in ciidamada amaanka ee dowladda Uganda ay garaaceen isaga iyo xubno kale oo saaxiibadiisa iyo taageereyaashiisa ah.
Bobi Wine, ayaa qoraallo uu ku daabacay bartiisa X ku sheegay in ciidamo isugu jira Booliis iyo millatari ay garaacis kala daaleen isaga iyo koox ka mida taageereyaashiisa xilli ay ku guda_jireen olalaha dooraso ee ay ka sameynayaan mid ka mid ah magaalooyinka dhaca waqooyiga waddankaasi.
Wuxuu xusay in ciidamadu ul uga dhufteen wejiga isagoo ku sugan Gulu, oo ah magaalada ugu weyn ee waqooyiga Uganda, sidoo kalena taageerayaal badan la garaacay, kuwaas oo weliba cisbitaal la dhigay.
“Dambiileyaal xirnaa dareyska ciidanka booliska iyo militariga ayaa nagu soo weeraray ulal iyo dhagxaan, waxayna bilaabeen inay na garaacaan,” ayuu ku yiri Bobi Wine mid ka mid ah qoraalladiisa.
“Mid ka mid ah kooxdooda ayaa ul igu dhuftay wejiga… dhowr saaxiibo ahna cusbitaal bay jiifaan. arrimahan waxaa sabab u ah Museveni oo aad uga baqanaya shacabka.” Ayuu sii raaciyay.
Wine ayaa sidoo kale sheegay in mid ka mid ah kaaliyayaashiisa madaxa lagaga dhuftay ul, isagoo soo dhigay sawir muujinaya dhiig ka soo qubanaya madaxiisa. Waxa uu intaas ku daray in qalabkiisii ololaha, oo ay ku jireen cod-baahiyeyaashiisa la burburiyay.
Muuqaal uu soo dhigay bartiisa gaarka ah ayaa muujinaya ciidamo badan oo Boolis iyo militari isugu jira oo dadka ulo ku garaacaya, waxay na tani kusoo beegmaysaa xilli Arbacadii warsaxaafadeed uu soo saaray madaxa waxay ugu yeeraan xuquuqul Insaanka ururka Qaramada Midoobay, Volker Türk, uu kaga dayriyey waxa uu ku tilmaamay “cadaadis sii xoogeystay” oo lagu hayo mucaaradka Yugaandha, isaga oo sheegay in ugu yaraan 550 taageere oo ka tirsan xisbiga Wine la xiray sanadkan.
Dhankiisa afhayeenka militariga, Chris Magezi, ayaa ku eedeeyay Wine iyo taageerayaashiisa inay sameeyeen mudaharaad uu ku sheegay mid sharci-darro ah.
Bobi Wine, ayaa markii labaad shaaciyay in uu la loolamayo madaxweynaha keligii taliska 81 jirka ah ee Yoweri Museveni, kadib markii uu kaalinta labaad ka galay doorashadii dhacday 2021-kii.
About The Author
