Dowladda Suudaan ee uu hoggaamiyo General Cabdil-fataax Al-burhaan ayaa eedaymo culus u jeedisay dowladda Imaaraadka Carabta, xilli Xukuumada uu fadhigeedu yahay Port-sudan ay xiriirka u jartay Abuu Dubaay.
Wasaaradda Arrimaha debadda dowladda dabadhilifka ah ee Suudaan, ayaa sheegtay in dowladda camiilka ee Imaaraadka ay dalkeeda ka masaafurisay, sidoo kalena xirtay masuuliyiin iyo diblumaasiyiin ka tirsan qusuliyadda guud ee Suudaan ku leedahay caasimadda dalkaasi ee Dubai.
Waxay Suudaan shaacisay in Imaaraadka Carabta uu si aan habboonayn ula dhaqmay masuuliyiinta Suudaaneeska ah, iyagoo xubnaha ay qabteen isugu daray xarig, baaritaano iyo istijwaab sida lagu sheegay qoraalka kasoo baxay wazaaradda arrimaha debadda.
Warsaxaafadeedka maanta kasoo baxay wazaaradda arrimaha dibadda ayaa lagu yiri “maamulka Imaaraadka ayaa maalmihii u dambeeyay go’aan ku gaaray in uu musaafuriyo inta badan shaqaalaha qunsuliyadda guud ee Suudaan ee Dubaay, iyadoo aysan jirin wax sabab ah.”.
Xarigga iyo ceyrinta lagu eedeeyay in Imaaraadka kula kacay masuuliyiinta iyo diblumaasiyiinta Suudaan ayaa kusoo beegmaya xilli laba toddobad ka hor ay Suudaan ku dhawaaqday in ay xiriirkii u jartay Imaaraadka Carabta, lana go’aamiyay in la xiro safaaraddeeda iyo qunsuliyaddeeda guud, kaddib markii Imaaraadka lagu eedeeyay in uu taageero millatari siiyo maleeshiyada RSF ee dagaalka kula jira millatariga uu hoggaamiyo Al-burhaan.
About The Author
