Wararka ka imaanaya degmada Baraawe oo ah xarunta gobolka Sh/hoose, ayaa sheegaya in dab xoog leh uu ka kacay Geerish kuyaal magaaladaasi, kaasi oo gaystay burbur xooggan oo soo gaaray gaadiid kala duwan oo isugu jira kuwa xamuulka ah iyo gaadiidka rakaabka.
Dabka ayaa si gaar ah uga kacay sida lasoo wariyay Geerish lagu magacaabo Beebaha, waxaana uu dabku burburiyay gaadiid tiradooda lagu qiyaasay 15 baabuur, kuwaas oo isugu jiray gaadiidka xamuulka ah iyo kuwa dadku raacaan, geerishku dabka kacay ayaa ahaa goob gaadiidka lagu xareeyo.
Ilo wareedyo deegaanka ah ayaa soo sheegay in dabku socday in muddo ah, waxaana taasi ugu wacnaa inuusan jirin gurmad deg deg ah oo goobta la gaarsiiyay, waxaana dabka si iskood ah ula taclaayay dadka rayidka oo keli ku ahaa, waxayna si debkaasi u bakhtiiyaan adeegsanayeen biyo iyo ciid, maadaama aysan jirin gaadiid Demdamis ah.
Muuqaallo lagu baahiyay baraha bulshada ayaa muujinayay qiic iyo uuro ka baxayay goobta iyo gaadiidka Geerishka ku xareysnaa oo gubanaya, waxaa sidoo kale la arkayay dadka shacabka ah oo isku dayaya inay damiyaan dabka.
Marka laga soo tago xogta burburka gaadiidka ka badan 15 baabuur oo u badan kuwa Rakaabka ah, ma jiro tirokoob rasmi ah oo ku aadan khasaaraha, waxaa suuragal ah in khasaaraha uu intaas kasii badan yaahy maadaama uu dabku kacay xilli habeen ah, wararka qaar waxay khasaaraha ku sheegayaan 11 baabuur, halka goobjoogeyaal sheegeen in ay arkeen gaadiid 15 ah oo goobta ku gubtay oo 10 ka mid ah ay yihiin kuwa rakaabka yo 5 kuwa xamuulka ah.
About The Author
