Toogasho wadareed khasaare kala duwan dhalisay ayaa markale laga soo tabiyay waddanka Maraykanka, Taas oo ay dhimasho iyo dhaawac ku noqdeen inka badan 10 qof oo Ameerikaan ah.
Toogashadan oo si gaar ah kaga dhacday goob dadku ka tukaamaystaan oo kutaal magaalada Chesapeake ee gobolka Virginia ayaa la xaqiijiyay inay ku dhinteen ugu yaraan 10 qof oo Ameerikaan ah, Halka qofka weerarka gaystayna uu ku dhintay goobta, Sida ay soo wariyeen saraakiisha booliska.
Booliska magaalada Chesapeake ayaa warbaahinta gudaha u xaqiijiyay dhacdadan, Iyagoo sheegay in ruux hubeysan uu gudaha usoo galay goob laga tukaamaysto oo lagu magacaabo Walmart, Isagoo halkaas ka gaystay toogasho aan loo meel dayin.
Maamulka gobolka Virginia ayaa dhankiisa sheegay in la dilay qofka weeraryahanka ah ee weerarka ka gaystay hoolka ganacsiga caanka ah ee Walmart halkaas oo ay ku sugnaayeen dadyow badan oo Ameerikaan ah.
Dad goobjoogeyaal ah ayaa sheegay inay arkayeen ruuxa weerarka gaystay oo si ba’an u gaysanaya toogashada wallow markii dambe ay boolisku toogteen.
Waa toogashadii labaad oo maalmo kooban gudahood laga sooo sheego waddanka Maraykanka, Waddankan ayaana ka mid ah waddamada ugu amniga xun caalamka, Oo dadka naftooda ku qamaaray ay ka gaystaan toogashooyin tira beela oo ay dad badan ku dhintaan.
About The Author
