Waxaa marba marka ka dambaysay sii xoogaysanaya xiisadaha colaadeed ee ka socda gudaha dalka Itoobiya, gaar ahaan gobolka Amxaarada, halkaas oo dagaallo lagu hoobtay ay ku dhex-marayaan ciidanka Xabashida Itoobiya iyo maleeshiyaadka Amxaarada ee Fano.
In ka badan 100 askari oo ka tirsan ciidanka Xabashida Itoobiya ayaa lagu soo warramayaa in dhimasho iyo dhaawac ay ku noqdeen dagaallo culus oo ka dhacay jiidda hore ee deggaanka Raaya, ee waqooyiga bari ee gobolka Amxaarada, sida ay shaacisay jabhadda Fano.
Dagaalladan oo ahaa kuwo aad u xooggan ayay Fano xaqiijisay in subaxnimadii Khamiista ay ka bilowdeen ugu yaraan 6 jiho oo ka tiran jiidda hore ee deggaanka Raaya. Waxaana halkaasi ka dhacay dagaallo culus oo si weyn loogu wiiqay ciidanka Xabashida Itoobiya.
Maleeshiyaadka Fano ma aysan sheegin khasaaraha dhankooda soo gaaray, dhinaca dawladda Xabashida Itoobiyana kama aanay guullaha millateri ee maleeshiyaadka Fano ay sheegteen inay kasoo hooyeen gobolka Wollo.
Dhammaadka bishii hore, ciidamada dowladdu, waxay qirteen in ay la kulmeen mid ka mid ah guuldarrooyinkii ugu xumaa ee soo gaara tan iyo bishii Agoosto 2023 oo ah markii uu dagaalku ka bilowday gobolka Amxaarada. Waxaanu nidaamka Abiy Axmed uu ku eedeeyey maleeshiyaadka Tigreyga ee TPLF iyo ciidamada Eretriya in qayb ay ka ahaayeen qorshaynta iyo fulinta weerarradaasi.
Si kastaba ha ahaatee, dagaalladan muddada labada sanno ah ka socda gobolka Amxaarada ayaa u muuqda kuwo sii xoogaysanaya oo si xawliya ugu sii fidaya deggaanno hor leh. Iyadoo dhinaca gobolka Tigreegana laga cabsi qabo in mar kale ay halkaasi isku fara-saaraan ciidanka Xabashida Itoobiya iyo maleeshiyaadka mucaaradka ee TPLF.
About The Author
