Cuduro laayaan ah ayaa laga soo calaamadiyay ismaamullada kala duwan ee uu ka kooban yahay dalka Itoobiya, halkaas oo ay dhowr xubnood ugu dhinteen xanuunadaasi.
Warbixinta oo uu soo saaray xafiiska urur gaaleedka qaramada midoobay u qaabilan arrimaha bani’aadanimada ee dalka Itoobiya, ayaa sheegay in waddanka uu hadda la daalaa dhacayo xanuuno kala duwan oo ay ka mid yihiin jadeecada daacuunka iyo duumada, kuwaas oo khatar weyn ku ah caafimaadka bulshada.
Cudurka Daacuunka oo dalkaasi ka dillaacay, bishii Agoosto 2022, ayaa lagu sheegay in uu yahay kii ugu wakhtiga dheeraa ee laga diiwaan geliyo taariikhda waddanka Itoobiya, hayadda OCHA waxay sheegtay in xaaladda ugu daran ay ka jirto gobollada Canfar iyo Oromiya, kuwaas oo xaaladahaasi wajayay tan iyo saddexdii bilood ee la soo dhaafay.
Wargayska Addis Standard ayaa dhanka kale sheegay in 15 qof ay u dhinteen xanuunka jadeecada ee ka dillaacday mandiqadda Wagihimra ee ismaamulka Axmaarada, xaaladaha ugu daran ee uu wajahayo gobolka Axmaarada ah ayaa lagu sheegay abaaraha, kuwaas oo gallaaftay nolasha dad badan.
Machadka Caafimaadka dadweynaha ee ismaamulka Amhara, ayaa soo bandhigay tirakoob la sameeyay 2 toddobaad ka hor, Xogta ayaa tilmaamaysa in inka badan 1.2 milyan oo qof oo ku nool gobolkan ay soo riteen xanuunka duumada kow iyo tobankii bilood ee la soo dhaafay.
Boqollaal Itoobiyaan ah ayaa tan iyo 2022-kii cudurka Daacuunka ugu geeriyooday deegaanno ka tirsan dalkaasi, oo uu ka mid yahay ismaamulka Amhara, halka uu xanuunkan soo ritay kumannaan kale.
About The Author
