Khasaare lixaad leh oo isugu jira dhimasho dhaawac iyo burbur hantiyeed ayaa ka dhashay weerar toogasho ah oo ka dhacay gobolka Mine oo ka mid ah gobollada waddanka Maraykanka, halkaas oo lagu beegsaday illaa saddex goob oo mashquul badan.
Shabakadda CNN ee laga leeyahay waddanka Maraykanka ayaa sheegtay in toogashada illaa saddex xarun oo laba ka mid ah ay yihiin walmart iyo baar laga cunteeyo oo kuyaal magaalada Lewiston ee gobolka Mine, halkaas na lagu dilay ugu yaraan 22 xubnood, sidoo kalena lagu dhaawacay inka badan lixdameeyo kale.
Ilo wareedyo ka tirsan warbaahinta ka howlgasha Maraykanka ayaa laga soo xigtay in toogashada ugu xoogan lagu beegsaday labada meherad oo kuyaal gudaha magaalada Lewiston, booliska ayaa sheegay in ninka weerarkaasi ka dambeeyay uu ka tirsanaa ciidanka Kaydka Maraykanka, magaciisa ayayna ku sheegeen Robert Card, kaasi oo ah 41 sano jir Maraykan ah.
Booliska ayaa markii ay toogasho wadareedkan billaabatay bartiisa gaarka ah ee Facebook-ga soo dhigay qoraal kooban oo uu bulshada ku amrayay inay guryahooda ku nagaadaan albaabadana soo xirtaan, waxayna bartoodaasi soo dhigeen sawirka ninka lagu tuhmayo inuu ka dambeeyay weerarka.
Ninkan ayaa la sheegay in weerarka toogashada ah kaddib uu goobta isaga baxsaday, booliska Maraykanka ayaa intaas ku daray inay baadi goob ugu jiraan weeraryahanka, waxayna sidoo kale soo bandhigeen baabuurka uu watay ninka lagu tuhmayo inuu ka dambeeyay toogashada.
Muuqaallo iyo sawirro lagu baahiyay baraha bulshada ayaa muujinayay kala carar ku dhacay dadkii Ameerikaanka ahaa ee ka dukaamaysanayay labada meherad ee toogashada lagu beegsaday.
About The Author
