Faahfaahinno dheeraad ah ayaa laga helayaa iska hor’imaad xooggan oo gudaha magaalada Garoowe ku dhex maray maleeshiyaad ka wada tirsan maamulka ashahaada la dirirka ah ee Puntland, halkaas oo khasaare kala duwan uu kasoo gaaray dad rayid ah iyo dhinacyadii dagaallamay.
Ugu yaraan 1 askari iyo 3 qof oo rayid ah ayaa la xaqiijiyay inay ku dhaawacmeen iska hor’imaad dhowr iyo toban daqiiqo socday oo barxadda magaalada Garoowe ku dhexmaray ciidamo uu hoggaamiyo Generaalka lagu magacaabo Muxiyadiin Axmed Muuse iyo maleeshiyaad ka tirsan booliska saldhigga Garoowe.
Ilo wareedyo ku sugan Garowoe ayaa soo sheegay in israsaasaynta dhexartay labada ciidan ay sababtay in lagu kala cararo aagga barxadda, oo ah goob aad u mashquul badan, Waxaana intii ay isku dhacyadu socdeen oo lagu qiyaasay 15 daqiiqo hakad ku yimid isku socodka dadka midka gaadiidka iyo dhaqdhaqaaqa ganacsiga.
Lama shaacin sababta rasmigaa ee ka dambeysay isku dhacyadan hubeysan, wallow wararka qaar ay sheegayaan in iska hor’imaadka uu ka dambeeyay, ka dib markii ay isku dhaceen maleeshiyaad daacad u ah General Muxiyaddiin Gacamey iyo ciidamada booliska saldhigga.
Garoowe oo xarun u ah maamulka ashahaada la dirirka Puntland waxa joogta ka noqday isku dhacyada hubeysan ee u dhaxeeya maleeshiyaadka daacadda u ah maamulkan, iyo kuwa mucaaradka ah iyo maleeshiyaadka ka ganacsada maandooriyaha, kuwaas oo badanaa sababa khasaare nafeed iyo mid hantiyeed.
About The Author
