Maleeshiyaadka Fano ayaa lagu soo waramayaa inay weerar culus ku qaadeen deegaanka Woldiya ee gobolka Axmaarada ee dalka Itoobiya.
Ilo-wareedyo ayaa sheegaya in dagaalku uu ahaa mid xooggaystay, kadib markii ciidanka dawladda Xabashida Itoobiya ay hubka culus ku bar-tilmaameedsadeen goobo la sheegay in kooxda Fano ay ku leedahay gudaha magaallada Woldiya.
Ciidanka dawladda ayaa la sheegay in ay duqeeyeen goobo ay ka mid yihiin Wetek, Merto iyo Ezet oo dhammaantood ku yaal gudaha Woldiya. Sidoo kalena waxa uu dagaal culus ka qarxay Mechare Meda, Merto Eyesus, Sewa Meda iyo Amaya oo dhammaantood dhaca agagaarka isla magaallada Woldiya.
Walow dadka deggaanku ay sheegeen baabuurta gurmadka oo dhaawacyo daad-guraynaysa, haddana si rasmiya looma oga khasaaraha dhabta ah ee kala gaaray labada dhinac. Waxaanay ilo dadka deggaanka ah ay sheegeen in la arkayay saraakiil ka tirsan ciidanka dowladda oo lacago kala baxayay bangiyada kadib markii ay ka rajo-dhigeen inay difaacdaan magaallada.
Wararka ayaa intaas ku daraya in labo bangi oo magaallada ku yaallay ay ka dhaceen kooxo hubeysan oo haybtooda weli aan la xaqiijin, xilli sida la sheegayo maleeshiyaadka Fano laftarkoodu aanay joogin magaallada Woldiya.
Sidoo kale dagaallo xooggan ayaa laga soo sheegayaa wadada isku xirta Addis Ababa iyo koonfurta magaallada Woldiya. Waxa kale oo dirir xooggani ay ka dhacday Meta Ghiorthis, Sembo iyo deggaano u dhaxeeya Sirinka iyo Woldiya.
Abebe Fantaw oo ah afhayeenka Wollo Fano oo todobaadkan la hadlay Ethio News ayaa sheegay in ciidamada Fano ay isku gadaameen magaalooyin badan oo ka tirsan Waqooyiga Wollo. Waxa kale oo Jabhadda Fano ay sheegatay in weerar kedis ah ay ku qaadday magaallada Muja ee degmada Gidan ee waqooyi galbeed Wollo.
Weerarkan ayaa sida la sheegayo lagu bartilmaameedsaday Taliyeyaasha Ciidamada Difaaca Itoobiya, kuwa Rabshadaha iyo Maleeshiyaad, kuwaas oo xiligaasi shir ku lahaa magaallada. Janaraalkii Militariga ahaa ee deegaankaasi ayaa la sheegay in uu ka badbaaday weerarka.
Dhinaca kale ciidamada Fano ee ku sugan Gonder ayaa ka warbixiyay weeraro gaadmo ah oo ka dhacay bartamaha magaalada Gonder Belesa. Waxaanay sheegeen in khasaare xooggan ay gaarsiiyeen ciidanka dowladda. Iyadoo geesta waqooyi ee aagga Debark ay maleeshiyaadka Fano sheegeen inay ku dileen in ka badan 20 askari oo ka tirsan ciidanka dowladda.
Maamulka Abiy Axmed ayaa dhinaciisa sheeganaya inuu guulo milatari oo la taaban karo ka gaaray Bariga Gojjam, Galbeedka Gojjam, aagga Cawi, iyo koonfurta Gonder ee gobolka Axmaarada. Waxaanu carabaabay in dagaalladii ka dhacay deggaannadaasi ay ku dileen 1025 maleeshiyaadka Fano ah, 574 kalena ay ku dhaawaceen.
About The Author
