Bil ka hor waxaa xeebaha magaalada Berbera ee waqooyiga Soomaaliya lagu waayay koox kalluumeysato ah, kuwaas oo u jillaab tagay biyaha badda, kana kooban ilaa saddex xubnood.
Saddexdan qof ayaa iyagoo badqaba waxaa bil kaddib laga helay xeebaha dalka Jabuuti, cilad ku timid doonidii ay wateen ayaa lasoo wariyay inay keentay inay biyaha badda ku lumaan.
Mid ka mid ah saddexda xubnood ee xeebaha Jabuuti laga helay, ayaa sheegay in cilada ku timid doonida yar ay la tacaaliddeeda ku qaadatay, taasoo keentay inay muddo badan dul sabbeeyaan biyaha, ugu dambayna ay kasoo dhaceen xeebaha Jabuuti.
Khadar Ibraahim Cabdillaahi oo ka mid ah badmaaxiinta gaaray Jabuuti ayaa waraysi uu bixiyay ku yiri: “6-dii bishii 12, 2024, ayaanu ka baxnay magaalada Berbera, cilad ayaa nagu timi oo xagga laashka ah, baytariga ayaa naga dhacay, kadib waanu cadilanay, muddo 29 cisho ah ayaanu sabaynaynay,”.
Isagoo oo hadalkiisa sii wata ayuu intaas ku daray in dabeyluhu ahaayeen kuwa maamulayay markii ay ciladda ku timid kaddib, waxay sabbeeyeenaba waxa uu sheegay in 29 cisho kaddib ay kusoo xirteen Jabuuti.
Kalluumeysatada Soomaaliyeed ayaa dhibaatooyinka noocaan ah la kulma kolka ay cillado soo wajahaan, waxayna kalluumeysatada qaar ka tuuraan qaarado fog fog, halka kuwa qaarna ayba ku dhintaan biyaha badda.
About The Author
