Dowladaha Kenya iyo Haiti ayaa si rasmi ah u shaaciyay inay kala saxiixdeen heshiis dhanka ammaanka ah, kaas oo qayb ka ah in xukuumadda Nayroobi ay 1,000 askari oo booliis gaar ah u dirto dalkan, si ay u gacan uga gaystaan dib usoo celinta xasilloonida dalkaasi.
Madaxda labadan waddan ayaa Jimcihii lasoo dhaafay magaalada Nayroobi ku kala saxiixday heshiiskan dhanka ammaanka ah, waxaana arimaha ugu badan ee keenay in heshiiskan qalinka lagu duugo ay tahay ka mira dhalinta qorshe dowladda Kenya ay doonayso inay ciidamo boolis ah ugu dirto waddankaasi, kuwaas oo qayb ka noqon doono howlgal uu hoggaaminayo urur gaaleedka qaramada Midoobay, si wax looga qabto rabshadaha burcadda ah ee ka jira dalkaasi.
Xafladda heshiiskan oo ka dhacday Nairobi, ayuu Madaxweynaha Kenya William Ruto, oo uu dhinac taagnaa Ra’iisul Wasaaraha dalka Haiti, Ariel Henry, sheegay in labada dowladood ay saxiixeen heshiis is dhaafsi, si loogu oggolaado in la soo daadgureeyo ciidamadaas.
“Waxaan aaminsanahay in tani ay tahay waajib taariikhi ah sababtoo ah nabadda Haiti waxay u wanaagsan tahay adduunka oo dhan,” waxaa sidaas yiri Ruto oo ah madaxweynaha Kenya.
Kenya ayaa markii ugu horreysay go’aansatay inay si mutadawacnimo ah waddanka Haiti ugu dirto 1,000 askari oo booliis gaar ah, si ay uga jawaabaan codsi uga yimid Haiti, taasi oo la dhibban rabshado gudaha ah oo ay hurinayaan kooxo fallaago ah.
Maxkamadda sare ee Kenya ayaa bishii Janaayo ee lasoo dhaafay si cad u diidday tallaabadan, waxayna go’aanka dowladda ku sheegtay in uu yahay mid mid aan dastuuri ahayn.
About The Author
