Warbaahinta dalka Kenya oo soo xiganaysa saraakiil ka tirsan ciidanka Kenya ee ku sugan gobolka Mandheera ee ka tirsan dhulka NFD, ayaa sheegtay in qarax culus oo ka dhacay Ceel-waaq Kenya lagu dilay ugu yaraan 10 xubnood oo isugu jira saraakiil ciidan, mucallimiin iyo shaqaale caafimaad oo Kiristaan ah.
Waxay sheegtay in qaraxa oo ahaa mid xoogan oo jugtiisa si wayn loo maqlay uu ka dhacay kasoo horjeedka saldhigga ciidanka booliska ee magaalada Ceel-waaq Kenya ee ka tirsan gobolka Mandheera, waxaana lagu beegsaday saraakiil ciidan, shaqaale iyo mucallimiin Kiristaan ah oo ku sugnaa aaggaasi.
Warbaahinta Kenya waxay xaqiijisay dhimashada10 xubnood oo isugu jira saraakiil, mucallimiin iyo shaqaale Kististaan ah oo u shaqeynayay dowladda Kenya, kuwaas oo aan deegaanka u dhalan, balse ay halkaasi gaysay xukuumadda Nairobi.
Saraakiil boolis ah oo u waramay warbaahinta maxalliga ah ee kenya ayaa sheegay in qaraxa ay uga shakiyeen in ay ka dambeeyeen rag ka tirsan mujaahidiinta Al-shabaab, qaraxaas ayay sheegeen in uu dhacay abbaare 7:12 daqiiqo subaxnimo ee Isniinta, qaraxa ayaa keenay in la hakiyo shaqada Bankiga Kenya laantiisa uu ku leeyahay magaalada Ceel-waaq Kenya.
Wasiirka arrimaha gudaha Kenya, ninka lagu magacaabo Kithure Kindiki, ayaa dhankiisa xaqiijiyay qaraxa, isagoo sheegay in uu weerarkaasi ahaa qarax argagaxiso oo lagu dilay shan xubnood oo Kiristaan Kenyaan ah, waa sida uu hadalka u dhigaye, hadalkan kasoo yeeray Kenya ee ay ku xaqiijinayso khasaaraha ku gaaray weerarkan ayaa kusoo beegmaya xilli mujaahidiintu xaqiijiyeen in qarax ay ka fuliyeen magaalada Ceel-waaq Kenya (Ceelqaalow) ay ku dileen 10 xubnood oo Kiristaan Kenyaan ah.
About The Author
