Khasaare kala duwan oo isugu jira dhimasho iyo mid burbur ayaa ka dhashay shil baabuur oo saacadihii lasoo dhaafay ka dhacay meel duleedka galbeed kaga beegan magaalada Hargaysa ee xarunta gobolka waqooyi galbeed ee Soomaaliya, halkaas oo maalmihii dambe ay ku badanayeen shilalka gaadiidka.
Ilo wareedyo maxalli ah oo ku sugan gudaha magaalada Hargaysa ayaa sheegay in shilkan gaari ay ku dhinteen ugu yaraan laba wiil oo dhalinyaro ah, kuwaas oo magacyadooda lagu kala sheegay Siciid Maxamed Cumar Samriye iyo Xamsa Khaalid Cabdillaahi Falaago.
Shilkan gaari ayaa yimid kaddib markii ay isku dhaceen laba gaari oo kala ah gaari yar oo nooca raaxada ah iyo gaari kale oo booyad ah, halka ay iskula dhaceen ayaana ah jidka dheer ee isku xira magaalooyinka Hargaysa iyo Gebiley.
Dhulka uu ka arrimiyo maamulka ashahaada la diririka ah ee isku magacaabay Somaliland waxa ku badan shilalka gawaarida, kuwaas oo dhaliya khasaare naf iyo maalba leh, sanadkii hore oo kaliya waxaa gobollada uu ka arrimiyo maamulkaan ka dhacay ilaa 6,536 shil kuwaas oo ay ku dhinteen dad gaaraya 198 qof kuna dhaawacmeen shaqsiyaak kale oo tiradoodu gaarayso 4,890.
About The Author
