Xilli Soomaalida ku dhaqan dalka Kenya, gaar ahaan caasimadda Nairobi ay wajahayaan dilal iyo gowrac ayaa saacadihii lasoo dhaafay qaybo ka mid ah magaaladaasi waxaa lagu dilay wiil dhalinyaro ah oo kasoo jeeda Soomaaliya.
Dilkan ayaa si gaar ah kaga dhacay xaafadda Islii ee ka tirsan deegaanka Kamukunji ee magaalada Nairobi , waxaana ilo wareedyo maxalli ah soo sheegeen in wiilkaasi dhalinyarada ah ay dileen rag watay mooto oo ku hubeysnaa baastoolad.
Kooxda dilka gaysatay oo lagu sheegay burcad ayaa toogasho ku dilay wiilkan dhalinyarada oo lagu magacaabi jiray Cabdiraxmaan Cabdullaahi Ibraahim, ka dibna waxay kasii qaateen burcaddu taleefoon uu watay, ilo wareedyo ayaa soo sheegay in xilligii wiilkan dhallinyarada ah la dilayay uu hor taagnaa albaabka laga galo dabaq lagu magacaabo DD Plaza oo kuyaal waddada 12-aad ee xaafadda Islii.
Ilo wareedyadu waxay intaas ku dareen in albaabka lagu hor dilay wiilka soomaaliyeed ay ka muuqatay rasaas iyo dhiig, taas oo walaac xooggan ku beertay dadkii ka ag dhawaa goobta dilku ka dhacay, waxayna tani kusoo beegmaysaa xilli xaafadaha Soomaalidu degto ee Nairobi ay toddobadyadii dambe kusoo badanayeen dilalka iyo beegsiga gaarka ah ee ka dhanka ah dadka Soomaaliyeed.
About The Author
