Faahfaahino dheeraad ah ayaa kasoo baxaya dabkii xoogganaa ee ka kacay Suuq Bacaad, oo ah suuqa labaad ee ugu weyn caasimadda Soomaaliya ee Muqdisho. Dabkaas oo billowday gelinkii dambe ee shalay ayaa soo gaaray ilaa saqdii dhexe ee xalay, kaas oo saakana lagu war helay isagoo weli kasii holcaya meherahadaha qaar.
Dabkan ayaa geystay khasaare baaxad leh, waxaana ku geeriyooday hal qof oo la sheegay inay ahayd gabar yar oo 6 sano jir ah, halka tobannaan qof oo kalena ay ku dhaawacmeen, kuwaas oo qaar ka mid ah la sheegay inay haleeshay rasaas ay rideen maleeshiyaadka riddadu.
Inta badan qeybaha ugu muhiimsan Suuq Bacaad ayaa ku basbeellay dabkan oo sida la sheegay kasoo billowday qeybta maacuunta, kuna fiday qeybaha kale ee suuqa. Waxaana soo baxaya tuhunno tilmaamaya in dabkan ay ku lug lahayd kooxda riddada, oo muddooyinkan dambe dhul-boob baaxad leh ka wadday guud ahaan caasimadda Muqdisho.
Qaar ka mid ah ganacsatada hantidooda ku waayay Suuq Bacaad ayaa ka warramay baaxadda khasaaraha uu dabkaasi geystay, iyo sidoo kale tuhunnada dul hoganaya kooxda riddada, oo sida la sheegay muddooyinkan dambe diiraddooda dhul-boob ay kusoo jeedday Suuqan, kaddib markii ay ka soo faraxasheen boobkii ay ka wadeen waaxyaha kale ee caasimadda.
Ganacsatadii isugu jirtay kuwo hoose, dhexe iyo sare ee ku hanti-beelay dabkan ka kacay Suuq Bacaad ayaa lagu soo warramayaa in haatan uu soo food-saaray walaac xooggan oo ay ka qabaan in gebi ahaanba dhulkii ay ku ganacsanayeen ee ku yaallay suuqan gubtay ay la wareegto kooxda uu gar-wadeenka ka yahay Murtad Gurguurte oo si weyn loogu tuhunsan yahay in iyagu ay ka dambeeyeen gubashada suuqan.
About The Author
