Kooxda Riddada Soomaaliya ayaa markii ugu horraysay ka hadashay markabka lagu magacaabo SEA WORLD ee uu maamulka ashahaada la dirirka Puntland shan maalmood ka hor ku qabtay xeebaha gobolka Bari, kaasi oo siday hub iyo shixnado kale oo ciidan oo loo waday kooxda Riddada Soomaaliya.
Warsaxaafadeed kasoo baxay kooxda Riddada ayaa lagu cambaareeyay qabsashada markabkaasi, waxayna kooxda Riddadu sheegtay in markabku hub usoo siday xerada Turkisom ee lagu tabobaro maleeshiyada murtadiinta ee ku taal magaalada Muqdisho, falka lagu qabtay markabkaasi ayayna ku sheegtay mid burcadnimo ah.
Nuqul ka mid ah warka kasoo baxay kooxda Riddada Soomaaliya ayaa lagu yiri” Markabku wuxuu ku sii jeeday Dekedda Muqdisho, isaga oo siday qalab ciidan, loona waday Xarunta Tababarka Ciidamada ee TURKSOM. Si waafaqsan heshiisyada iskaashiga difaac ee u dhexeeya Jamhuuriyadda Federaalka Soomaaliya iyo Jamhuuriyadda Turkiga, Shixnaddu waxay ku socotay sifo sharci ah oo si buuxda u waafaqsan shuruucda Dalka iyo kuwa caalamiga ah. Marka laga soo tago qalabka ciidan, markabku waxuu sidoo kale siday badeecooyin ganacsi oo ay leeyihiin ganacsatada Soomaaliyeed”.
Kooxda Riddadu ma aysan caddeyn waxay ku sheegayso badeecooyinka ganacsi ee markabka la socday, waxaase loo badinayaa in uuba yahay isla hubka lagu qabtay xeebaha gobolka Bari, kaasi oo wararka qaar ee la isla dhexmarayay ay sheegayeen inay soo rarteen ganacsato ku dhow Xassan Gurguurte oo hubkaasi kasoo iibsaday Turkiga.
Villa Somalia waxay maamulka Deni usoo jeedisay inay si shuruud la’aan ah kusii daayaan markabka, haddii ay ka biya diidaan oo markabku kusii xirnaado dekadda magaalada Boosaaso waxay ku goodisay kooxdan inay tallaabo ka qaadi doonto maamulka fadhigiisu yahay Garoowe.
Waxaana warka Riddada oo sii socda lagu yiri” Dowladdu waxay dalbaneysaa in si deg-deg ah oo shuruud la’aan ah loo sii daayo markabka, maadaama uu sido shixnad sharci ah oo loogu talagalay ujeeddooyin difaac, oo lagama maarmaan u ah sugidda amniga iyo xasilloonida dalka, oo ay ku jirto Puntland”, waxay intaa kusii dartay kooxda Riddadu” Sii heysashada sharci darrada ah ee markabka SEA WORLD, waxay horseedeysaa in Dowladda Federaalka ah ay tallaabo amni oo sharciga waafaqsan ka qaado goobaha iyo furdooyinka xuddunta u noqda falal burcad-badeednimo oo liddi ku ah xeerarka qaranka iyo kuwa caalamiga ah. Tilaabooyinkaas oo ay ku hubinayso amniga maraakiibta sida sharciga ah ku maraya badda Soomaaliya”.
Maamulka Riddada ee isku magacaabay Puntland ayaa horay u shaaciyay in markabka ay qabteen uu sifo sharic-darro ah ku gooshayay xeebaheeda, markabka hubka sida ee ay qabteen ayuu maamulkaas ku sheegay in uu khatar ku ahaa amniga deegaannada maamulkaasi.
About The Author
