Wararka ka imanaya dhulka Soomaali-galbeed ee ku hoos-jira gumaysiga Xabashia Itoobiya ayaa sheegaya in magaallooyin waaweyn oo deggaannadaasi ka tirsan uu nalku u dansanaa muddooyinkii u dambeeyey kadib markii koronto la’aan baahsani ay lasoo deristay.
Magaallooyinkaasi oo ay korontadu ka maqan tahay oo ay ka mid yihiin Jigjiga, Dhagaxbuur, Fiiq, Diridhaba iyo Harar ayaa lagu soo warramayaa in hakad uu ku yimid hawl-maalmeedka, taas oo bulshada ku abuurtay caqabado dhaqaale iyo mid caafimaadba.
Korontada deggaannadaasi oo laga keeno dhulka sare ee Itoobiya, ayay wararku sheegayaan in si gaar ah ay u saamaysay magaallada Jigjiga oo muddo dheer ay ka maqan tahay, taasi oo saameyn ku yeelatay ganacsiga iyo adeegyada daryeelka caafimaadka.
Ganacsatada iyo hawl-wadeennada caafimaadka ee deggaannadaasi oo warbaahinta la hadlay ayaa sheegay in ay lasoo daristay dhibaatooyin dhaqaale iyo khataro caafimaad oo halis ah. Waxaanay sheegeen xilligu loo diyaar-garoobayo ciidal-fidriga in ganacsiyo badani ay la kulmeen khasaare maaliyadeed, gaar ahaan kuwa ku tiirsan korontada.
Maamulka daba-dhilifka ah ee ka jira deggaannadaasi ayaa koronto la’aanta jirta ku sababeeyey xarkaha layrka oo go’ay kadib markii xatooyo loo gaystay taawarrada korontada gudbiya.
“Waxaa jira dad xaday biraha korontada, kadibna markii cimiladu is beddeshay way soo dumeen,” ayuu yidhi Shaafi Axmed Macallin oo ah duqa magaallada Jigjiga.
Masaajidda iyo qaybo ka mida goobaha ganacsiga ayaa lagu soo warramayaa inay mararka qaar isticmaalaan motoorro yaryar, balse dadka badankoodu ma awoodaan sababo la xiriira qiimaha shidaalka oo aad u sareeya guud ahaan Itoobiya.
Labo usbuuc ka hor ayuun bay ahayd markii ay dhaceen bannaan-baxyo ballaaran oo xiriir ah oo looga soo hor-jeeday koronto la’aan muddo dhawr bilood ah ka jirtay magaallada Mandheera ee gobolka Waqooyi Bari, oo ka mida dhulka ku hoos-jira gumaysiga Kenya.
Deggaannada Soomaali-galbeed iyo NFD ayaa ka mid ah meelaha ugu liita adeegga korontada ee Geeska Afrika. Waxaana sabab u ah gumaysiga Xabashida Itoobiya iyo Kenya oo marnaba aan ogolayn wax horumar ah oo ay ku tallaabsadaan ummadda muslimiinta ah ee Soomaaliyeed.
About The Author
