Kooxda caafimaadka Itoobiya ayaa ka warbixisay xaaladda caafimaad ee qaar ka mid ah ismaamullada waddankaasi, kuwaas oo laga soo diiwaan geliyay kiisas badan oo cudurro ah.
Warbixintu waxay sheegtay in dadka Itoobiyaanka ah ay la dhibanyihiin xanuunnada kala ah, Daacuunka, Duumada iyo Jadeecada, kuwaas oo ay u dhinteen ku dhawaad 150 xubnood, halka ay asiibeen ku dhawaad laba milyan oo kale.
Cudurka Daacuunka ama Shuban-biyoodka, waxay kooxdan caafimaad sheegtay in uu soo ritay 4,056 xubnood iyo dhimashada 42 qof oo kale, kiisaskaasina laga soo diiwaan geliyay ilaa 32 degmo iyo 5 xero qaxooti, kuwaas oo kala dhaca Ismaamullada Amxaarada iyo Gambella.
Kooxdan waxay sidoo kale sheegtay in la xaqiijiyay 1.97 milyan oo kiis iyo 77 kale oo dhimasho ah, kuwaas oo uu ku dhacay xanuunka loo yaqaan Duumada ama Maleeriyada, waxaana warbixinta lagu xusay in gobolka Gambella laga diiwaan geliyay kiisaska ugu badan ee cudurkan.
Kooxda caafimaadka Itoobiya waxay sidoo kale sheegtay in la xaqiijiyay kiisas ku saabsan xanuunka Jadeecada oo dhan 3,908 kiis iyo dhimashada 22 xubnood oo kale, waxaanu cudurkaasi ka dillaacay 8 gobol oo ay ka mid yihiin Amxaarada, Oromada iyo Tigray.
Warbixintu waxay intaas ku dartay in 96 kiis oo cusub oo xanuunka Jadeecada bishii Abriil laga soo diiwaangeliyay degmada Deder ee gobolka Oromia, waxayna kiisaska guud ee dhimashada xanuunnadan sidaas ku noqonayaan 141 xubnood, halka bukaannada la jiifa xanuunnadaasina ay gaarayaan ku dhawaad laba milyan oo xubnood, waxaana xusid mudan in kiisaskan la diiwaan geliyay intii u dhexeysay bilihii Janaayo iyo Abriil sannadkan 2025-ka.
About The Author
