Xilli dadka ku dhaqan waddanka Suudaan ay wajahayaan xaalado macluul ah oo ka jira dalkaasi kana dhashay dagaallada culus ee u dhaxeeya ciidamada millatariga ee uu hoggaamiyo General Al-burhan iyo maleeshiyada RSF ee uu Imaaraadku taagaaro ayay dadka u dhimanayaan gaajo daran.
Warbixino cusub oo soo baxay ayaa xaqiijiyay in ugu yaraan 46 ruux oo reer Suudaan ah ay bishan iyo tii ka horeysay ay gaajo ugu dhinteen magaalooyin dhaca koonfurta Kordafan, kaddib markii uu gabaabsi noqdeen cuntadii iyo agabyada kale ee muhiimka u ah nolasha aadanaha.
Shabakad dhakhaatiira oo dalkaasi ka howlgala ayaa sheegay inay xaaladda gobolka kasii dartay markii maleeshiyada RSF ay joojiyeen dawooyin, abagyo iyo cuntooyin kusoo jeeday magaalooyinka qaar.
“Fariiqa shabakaddu waxay diiwaan geliyeen dhimashada 46 qof oo labadii bilood ee la soo dhaafay ee July iyo Agoosto Koonfurta Kordofan ugu dhintay nafaqo darro.” Ayaa lagu yiri warka kasoo baxay kooxdan.
Waxay intaas ku dareen in in ka badan 18,000 oo haween uur leh iyo kuwo nuujinaya ay xilligan si degdeg ah ugu baahan yihiin nafaqo dheeraad ah, si loo badbaadiyo, warbaahinta maxalliga ah ayaa sheegtay in tani muujineyso marxaladda adag ee ay maarayso dhibaatada ka jirta gobolka.
About The Author
