“Digniinta AUSSOM ee dhimista ciidankeeda oo dhalisay cabsi ku saabsan kororka Jihaadiyiinta Soomaaliya” Waa cinwaanka warbixin uu saacadihii lasoo dhaafay baahiyey wargeyska Ash-Sharqul Awsad oo ka mida warbaahinta ugu afka dheer waddamada Carabta, fadhigiisuna yahay magaalada London ee carriga Ingiriiska.
Warbixinta uu wargeysku diyaariyey oo soo baxday saacadihii lasoo dhaafay ayaa tibaaxaysa in dhimista tirada ciidamada AUSSOM uu yahay qorshe laga fikiraayo oo haatan miiska saaran, xilli Midowga Afrika uu wajahayo ayuu yiri dhaqaale la’aan baahsan, isla markaana mujaahidiinta Al-Shabaab ay sare u qaadeen hawl-galladooda.
Wargeysku waxa uu sheegay in dhaqaale la’aanta ku habsatay calooshood-u-shaqaystayaasha Afrikaanta ay timid kadib markii Maraykanku uu ka caga-jiiday maal-gelinta hawl-galkan. Taas oo sabab u noqotay in haatan laga fikiro sidii loo yarayn lahaa tirada ciidamada Midowga Afrika ee ku sugan Soomaaliya.
Falanqeeye ku takhasusay arrimaha Afrika oo la hadlay Ash-sharqul Awsad, ayaa ka dhawaajiyey in dhimista la filayo in lagu sameeyo ciidamada Afrikaanta, ay khatar weyn ku tahay amniga kooxda riddada, isla markaana ay sare u qaadi doonto weerarrada ay fuliyaan mujaahidiinta Al-Shabaab.
Waxa uu saadaaliyay falanqeeyahani in waddamada qaybta ka ah howl-galka AUSSOM ay khasab ku noqon doonto in ay bixiyaan kharashaadka ciidamadooda, inta la raadinayo taageero ka timaadda Midowga Yurub iyo ilo dhaqaale oo cusub.
Dr. Cabdullaahi Axmed Ibraahim, agaasimaha Xarunta Daraasaadka Bariga Afrika ee Nairobi, oo la hadlay wargeyska Ash-Sharqul Awsad ayaa sheegay in maal-gelinta calooshood-u-shaqaystayaasha Afrikaanta ay horey uga iman jirtay Mareykanka iyo Midowga Yurub, hase yeeshee Mareykanku uu hadda ka baxay taageeradaasi, isagoo ku cadaadinaya Midowga Afrika inuu iskiis u maalgeliyo ciidamadiisa, taasina ay tahay ayuu yiri arrin aan marnaba suurtagal ahayn.
Waxa kale oo Dr Cabdullaahi uu intaasi ku daray in dhimista ciidamada AUSSOM ay si toos ah u dhiirri-gelinayso koror ku yimaadda weerarrada Al-Shabaab, maadaama ayuu yiri aanay jirin ciidan Soomaaliyeed oo awood u leh iska caabbinta mujaahidiinta oo muddooyinkii u dambeeyeyey la wareegey magaalooyin istaraatiijiya.
Suurtagalnimada miro-dhalka shir midowga Afrika uu doonayo in dhawaan uu ku qabto magaalada Dooxa ama London si loo helo taageero dhaqaale oo deg deg ah, ayuu Dr. Cabdullaahi Ibraahim sheegay in tallaabadaasina ay ku xiran tahay go’aanka Mareykanka, oo haatanba si cad uga hor-yimid maal-gelinta hawl-galkan.
About The Author
